Чоршанба куни Лондонда Украина ва АҚШ делегациялари музокара ўтказди. Гарчи, мулоқот даражаси пасайганига қарамай, Киев вакиллари Лондонга келган. Украина делегацияси таркиби Президент маъмурияти раҳбари Андрей Ермак, ташқи сиёсат идораси бошлиғи Андрий Сибига ва мудофаа вазири Рустем Умеровдан иборат эди.
– Тинчлик жараёнини бошлаш шарти сифатида тўлиқ ўт очишни тўхтатиш масаласи муҳокама қилинди, суверенитет ва ҳудудий яхлитлик бўйича ён бериб бўлмаслиги таъкидланди, – деб ёзди суҳбат мазмуни ҳақида Ермак ижтимоий тармоқ орқали.
– Делегациямиз Лондонда АҚШнинг Украина ва Россия масалалари бўйича элчиси Кит Келлог билан учрашди. Биз қарашимизни билдирдик, зудлик билан, тўлиқ ва сўзсиз ўт очишни тўхтатиш адолатли, мустаҳкам тинчликка эришиш учун музокара бошлаш йўлидаги илк қадам бўлиши кераклигини таъкидладик. Украина ҳар қандай шароитда муҳим позициясини ҳимоя қилади, чунки бу мамлакат суверенитети, ҳудудий яхлитлиги асосини ташкил қилади.
Андрий Сибига Украина Трампнинг тинчликка эришиш йўлидаги саъй-ҳаракатига содиқлигини тасдиқлаб, адолатли тинчлик бўйича мулоқотга тайёрлигини таъкидлаган. Урушни тугатиш йўллари батафсил муҳокама қилинганини такрорлаган.
Рустем Умеров миллий телемарафонда чиқиш қилиб, учрашув самарали ўтганини билдирди. Украина томони изчил ёндашув, ўт очишни тўхтатиш, шунингдек хавфсизлик кафолати ҳақида гапирганига эътибор қаратди.
Буюк Британия Ташқи ишлар вазирлиги масъулллари фикрича, рейтинги пасайтирилганига қарамай, Лондондаги музокара кейинги қадамлар бўйича умумий қарашларни белгилаш учун муҳим аҳамият касб этган.
Қироллик ҳукумати сайтида чиққан баёнотда томонлар тез орада кейинги мулоқот уюштирилишидан умидворлиги қўшимча қилинган.
Мазкур масалага Франция ҳам муносабат билдирди. Хусусан, “Франc-Пресс” агентлиги ёзишича, Елисей саройи Украинанинг ҳудудий яхлитлиги ҳурмат қилиниши европаликларнинг можарони ҳал қилиш бўйича асосий талаби эканини таъкидлаган.
Оқ уй раҳбари Дональд Трамп журналистлар билан учрашувда Лондон музокарасига баҳо бераркан, “Менимча, яхши ўтди”, деган.
С.Раҳимов, ЎзА