Sárshembi kúni Londonda Ukraina hám AQSh delegaciyaları sóylesiw ótkerdi. Sóylesiw dárejesi tómenlegenine qaramay, Kiev wákilleri Londonǵa kelgen. Ukraina delegaciyasınıń quramı Prezident administraciyasınıń basshısı Andrey Ermak, sırtqı siyasat uyımınıń baslıǵı Andrey Sibiga hám qorǵanıw ministri Rustem Umerovtan ibarat boldı.
– Tınıshlıq procesin baslaw shárti sıpatında tolıq oq atıwdı toqtatıw máselesi dodalandı, suverenitet hám aymaqlıq pútinlik máselesi boyınsha kelisip bolmaytuǵını atap ótildi, – dep jazdı sáwbet mazmunı haqqında Ermak sociallıq tarmaq arqalı.
– Delegaciyamız Londonda AQShtıń Ukraina hám Rossiya máseleleri boyınsha elshisi Kit Kellog penen ushırastı. Biz kózqarasımızdı bildirdik, operativ, tolıq hám sózsiz oq atıwdı toqtatıw ádalatlı, bekkem tınıshlıqqa erisiw ushın sóylesiwdi baslaw jolındaǵı birinshi qádem bolıwı kerek ekenligin atap óttik. Ukraina hár qanday sharayatta áhmiyetli poziciyasın qorǵaydı, sebebi bul mámlekettiń suverenitetin, aymaqlıq pútinliginiń tiykarın quraydı.
Andrey Sibiga Ukraina Tramptıń tınıshlıqqa erisiw jolındaǵı háreketine sadıqlıǵın tastıyıqlap, ádalatlı tınıshlıq boyınsha sóylesiwge tayar ekenin atap ótken. Urıstı tamamlaw jolları hár tárepleme dodalanǵanın tákirarlaǵan.
Rustem Umerov milliy telemarafonda shıǵıp sóylep, ushırasıw nátiyjeli ótkenin bildirdi. Ukraina tárepi basqıshpa-basqısh qatnas jasaw, oq atıwdı toqtatıw, sonday-aq, qáwipsizlik kepilligi haqqında aytqanına itibar qarattı.
Ullı Britaniya Sırtqı isler ministrligi juwapkerleriniń pikirinshe, reytingi tómenletilgenine qaramastan, Londondaǵı sóylesiw keyingi qádemler boyınsha ulıwmalıq kózqaraslardı belgilew ushın ayrıqsha áhmiyetke iye.
Patshalıq húkimeti saytında shıqqan bildiriwde tárepler tez arada keyingi sóylesiw shólkemlestiriliwinen úmit etkeni qosımsha etilgen.
Bul máselege Franciya da múnásibet bildirdi. Atap aytqanda, “Franc-Press” agentliginiń jazıwınsha, Elisey sarayı Ukrainanıń aymaqlıq pútinligine húrmet etiliwi evropalılardıń kelispewshilikti sheshiw boyınsha tiykarǵı talabı ekenin atap ótken.
Aq úy basshısı Donald Tramp jurnalistler menen ushırasıwda London sóylesiwine baha berip, «Menińshe jaqsı ótti», degen.
S.Rahimov, ÓzA