2025 йил – «Атроф-муҳитни муҳофаза қилиш ва «яшил» иқтисодиёт йили»га белгиланган чора-тадбирлар самарали давом этмоқда.

Жорий йил 16 апрель куни Қорақалпоқ давлат университетида Хитой Халқ Республикасининг «SINOWAY FOREST» компанияси билан ҳамкорликда ANSO-CR-KP-2021-13:  «Оролбўйи минтақасининг чўл ва нордон тупроқларида экологик тикланиш» мавзусида халқаро пилот лойиҳа ўз ишини бошлади.

Лойиҳани амалга ошириш тадбирининг бошланишида «SINOWAY FOREST» компанияси менежери Тао Лиу ҳамда Синцзян Экология ва география институти Хитой Фанлар академиясининг техник илмий ходимлари Ванг Жунлин ва Жиа Хионгўеилар иштирок этди.

Шу куни Қорақалпоғистон Республикаси Ўрмон хўжалиги бошқармасининг Нукус туманига қарашли Нукус шаҳрининг жанубида жойлашган «Қизилқум» массивида тажриба ишлари учун 1 гектар ерга саксовул, жинғил, қорабуроқ ўсимликларининг 2400 туп кўчати ва уларнинг уруғларининг биошарларини (чиринди билан озиқлантирилган уруғ) махсус қурилмалар билан экиш ишлари бошланди.

Айни пайтда тажриба майдонини сим тўсиқлар билан ўраш режалаштирилмоқда.

Инвестиция лойиҳасида университетнинг Биология факультети профессор-ўқитувчилари, докторантлар, магистрантлар, талаба-ёшлар ва ўрмон хўжалиги ходимлари иштирок этмоқда.

Айни пайтда лойиҳанинг иккинчи тажриба майдони сифатида Орол денгизининг қуриган тубидаги 1 гектарлик майдонга чўлга мослашган ўсимлик кўчатларини экиш ишлари ташкил этилмоқда.

Қорақалпоғистон ахборот агентлиги