2025-jıl – «Qorshaǵan ortalıqtı qorǵaw hám «jasıl» ekonomika jılı»na belgilengen ilajlar nátiyjeli dawam etpekte.

Usı jıl 16-aprel kúni Qaraqalpaq mámleketlik universitetinde Qıtay Xalıq Respublikasınıń «SINOWAY FOREST» kompaniyası menen birgelikte ANSO-CR-KP-2021-13: «Aral boyı regionınıń shól hám qıshqıl topıraqlarında ekologiyalıq tiklew» atamasında xalıqaralıq pilot joybar óz jumısın basladı.

Joybardı ámelge asırıw ilajınıń baslanıwında «SINOWAY FOREST» kompaniyası menedjeri Tao Liu hám Sinczyan Ekologiya hám geografiya institutı Qıtay Ilimler Akademiyasınıń texnikalıq ilimiy xızmetkerleri Wang Junlin hám Jia Xiongweiler qatnastı.
Usı kúni Qaraqalpaqstan Respublikası Toǵay xojalıǵı basqarmasınıń Nókis rayonına tiyisli Nókis qalasınıń qublasında jaylasqan «Qızılqum» massivinde tájiriybe jumısları ushın 1 gektar jerge seksewil, jıńǵıl, qarabaraq ósimlikleriniń 2400 túp nálleri hám olardıń tuqımlarınıń biosharların (shirindi menen azıqlandırılǵan tuqım) arnawlı qurılmalar menen egiw jumısları baslandı.
Házirgi waqıtta tájiriybe maydanın sım tosıqlar menen qorshaw rejelestirilmekte.
Investiciyalıq joybarda universitettiń Biologiya fakultetiniń professor-oqıtıwshıları, doktorantlar, magistrantlar, student-jaslar hám toǵay xojalıǵınıń xızmetkerleri qatnaspaqta.
Házirgi waqıtta joybardıń ekinshi tájiriybe maydanı sıpatında Aral teńiziniń qurıǵan ultanındaǵı 1 gektarlıq maydanǵa shólge iykemlesken ósimlik nállerin egiw jumısları shólkemlestirilmekte.

Qaraqalpaqstan xabar agentligi