Нукус гарнизонидаги ҳарбий қисмлардан бирида «Ватанпарварлар» мусобақасининг Қорақалпоғистон Республикаси босқичи ўтказилди. Унда республикамизнинг 17 шаҳар ва туманларидан энг сара жамоалар иштирок этиб, соғлом рақобат муҳитида куч синашиш, билим, иқтидор ва куч-ғайратини намойиш этиш имкониятига эга бўлди.

Ўзбекистон Республикаси Мудофаа, Ички ишлар ва Фавқулодда вазиятлар вазирликлари, Ёшлар ишлари агентлиги, Давлат хавфсизлик хизмати, Миллий гвардия, Ёшлар иттифоқи марказий кенгаши, Мактабгача ва мактаб таълими вазирлиги, «Ватанпарвар» ташкилоти марказий кенгаши ва бошқа давлат жамоат ташкилотларининг 2024 йилдаги қўшма қарорига мувофиқ, мамлакатимиздаги барча умумий ўрта таълим мактабларидаги «Ватан таянчи» отрядларига аъзо бўлган битирувчи синф ўқувчилари ўртасида Мудофаа вазири кубоги учун ўтказилаётган «Ватанпарварлар» ҳарбий-спорт мусобақаси ёшларда ҳарбий хизматга қизиқиш уйғотиб, уларни ватанпарварлик руҳида тарбиялашга ҳисса қўшмоқда.

Ўқувчилардаги ҳаяжон, ғалабага бўлган ишонч беллашувнинг ҳар бир шартида яққол кўзга ташланди.

Ҳар бир жамоа аъзолари ўзига хос ҳарбий кийимларда фахрли саф тортиб, кучли рақобат учун ўзларини руҳан тайёрлади. Қатъий тартиб-интизом ва ғалабага бўлган кучли интилиш беллашувнинг ҳар бир сониясини ҳиссиётга, куч-ғайратга тўлдирди.

Мусобақанинг очилиш маросимида Шимоли-ғарбий ҳарбий округ қўшинлари қўмондонлиги, Қорақалпоғистон Республикаси Мактабгача ва мактаб таълими вазирлиги, Ёшлар иттифоқи Қорақалпоғистон Республикаси кенгаши ва «Ватанпарвар» ташкилоти Қорақалпоғистон Республикаси кенгаши аъзолари ҳамда бошқа давлат, жамоат ташкилотлари вакиллари, чақириққача ёшларни тайёрлаш фани ўқитувчилари ва ўқувчилар иштирок этди.

Сўзга чиққанлар мусобақа иштирокчиларига эзгу тилакларини билдирди.

Ўқувчи-ёшларни ҳарбий-амалий спорт мусобақаларига кенг жалб этиш орқали уларнинг бўш вақтини мазмунли ташкил этиш, ўзаро маданий-спорт алоқаларини йўлга қўйиш ва ёшларни спорт ўйинларига кенг жалб этиш, соғлом турмуш тарзига одатлантириш, маънан ва жисмонан соғлом, баркамол авлодни тарбиялашга қаратилган ушбу мусобақа беш йил ичида ёшлар ўртасида минглаб мухлисларини тўплаб улгурди.

Таъкидлаш жоизки, 2021 йилги «Ватанпарварлар» ҳарбий-спорт мусобақаларининг финал босқичи якунига кўра Қорақалпоғистон Республикаси шарафини ҳимоя қилган Кегейли тумани ёшлари фахрли биринчи ўринни эгаллаб, Мудофаа вазири кубогини биринчилардан бўлиб қўлга киритди.

2024 йилда Қорақалпоғистон Республикасининг чекка ҳудудларидан бири – Қонликўл туманидаги мактабнинг «Лочин» жамоаси мусобақанинг финал босқичида шоҳсупанинг энг юқори поғонасидан жой олиб, Мудофаа вазири кубогини иккинчи марта қўлга киритди.

Мусобақа низомига кўра беллашувда ҳар бир жамоадан 7 ўғил ва 3 қизнинг иштирок этишига рухсат берилган. Ҳарбий-спорт мусобақасининг «Мерганлар беллашуви» деб номланган 1-шарти бўйича ёшлар спорт милтиғидан назорат отиш машқи орқали мерганлик маҳоратини намойиш этди. 5 нафар ўғил бола қатнашган «Турникда тортилиш» шартида 4 дақиқа вақт ичида кучларини синаб кўриб, энг кўп натижа қайд этиши керак эди.

«Ҳарбийлаштирилган эстафета» деб номланган 3-шартда иштирокчилар автоматни тўлиқ бўлмаган қисмларга ажратиши ва йиғиши, газга қарши ниқобни кийиши ва ўқ-дори қутисини кўтариб югуриши керак эди. Бу шартда жамоадан 4 нафар иштирокчи қатнашди.

Мусобақанинг «Жабрланувчига биринчи ёрдам кўрсатиш» деб номланган 4-шартида икки иштирокчи 50 метр масофага юкни кўтарган ҳолда югуради ва маррада ётган шартли жабрланувчига биринчи тез тиббий ёрдам кўрсатади. Шундан сўнг жабрланувчини замбилга кўтариб, маррага қараб югуради.

«Сафда қўшиқ айтиш» деб номланган кейинги шартда жамоалар саф тортиб, ҳарбий қўшиқларни жонли ижро этиши белгиланган. Унда саф элементларини режа қоидалари асосида бажариши, сафда юриши, қўшиқ айтиши, кийим-кечаклари учун ҳар бир жамоа баҳоланди.

«Билимдонлар» деб номланган шартда ўқувчилар электрон дастур орқали Жалолиддин Мангуберди, Амир Темур, Заҳириддин Муҳаммад Бобурнинг ҳарбий хизмати, Марказий Осиё давлатчилиги тарихи ва Ўзбекистон тарихи бўйича 15 тадан 30 тагача тест саволларига жавоб бериши ва уларнинг ҳар бири учун қўшимча балл олиши мумкин бўлди.

«Ватан мадҳияси» бадиий-ҳаваскорлик танловида жамоаларнинг бадиий маҳорати синовдан ўтказилади. Унда камида 5 та жамоада иштирок этган иштирокчилар жамоавий ва якка тартибда ватанпарварлик руҳидаги миллий қўшиқларни куйлаб, ўз маҳоратларини намойиш этди.

«Орқага ётган ҳолатдан гавдани кўтариш,» яъни қорин мушакларига (пресс) машқларни бажариш шартида ҳам барча иштирокчилар соғлом турмуш тарзини танлаб, спорт билан танишлигини кўрсата олди.

«Арқон тортиш» мусобақасида ёшлар жамоада бир ёқадан бош чиқариб, ҳамкорликда ишлашини кўрсатиб, беллашди.

Бу йилги мусобақа режасига киритилган янги шартлардан бири, яъни «Smart sardor» ихтирочилик танловида иштирокчилар ўзлари ўйлаб топган робототехника ёки бошқа замонавий лойиҳаларни тақдим этиши киритилган. Танловнинг асосий мақсади сифатида ёш авлодда юқори технологиялар соҳасига қизиқиш уйғотиш, уларнинг салоҳиятини рўёбга чиқаришга кўмаклашишдан иборат.

Мусобақанинг ҳар бир шартларида иштирокчиларнинг хатти-ҳаракатлари вақт ўлчови билан холис баҳолаш механизми асосида баҳоланиб борилди.

Эслатиб ўтамиз, Қорақалпоғистон Республикасидаги 710 мактаб ва 20 ихтисослаштирилган мактабларда 723 «Ватан таянчи» отрядлари фаолият юритиб, уларда 8293 ўғил бола ва 3939 қиз бола, жами 12 232 аъзо бор.

Мусобақанинг ёпилиш маросимида сўзга чиққанлар бугунги кунда мамлакатимиз ёшларига қаратилаётган эътиборни, уларни ҳарбий-ватанпарварлик руҳида тарбиялашдаги ютуқларни эътироф этиб, ҳарбий округ ҳудудида ана шундай тадбирларни ўтказиш учун барча шароитлар бундан буён ҳам яратиб берилишини таъкидлади.

Мусобақа шартлари бўйича алоҳида кўрсаткичларга эришган ўқувчи-ёшлар ва жамоалар тақдирланди. Унга кўра «Энг кучли спортчи,» «Энг яхши мерган,» «Энг яхши билимдон,» «Энг яхши ижрочи» ва «Энг яхши ихтирочи» каби бир қатор номинациялар бўйича ёшлар якка тартибда ва жамоавий тартибда тақдирланди.

Барча шартлар бўйича юқори натижа кўрсатган Қонликўл туманидаги 2-сонли мактабнинг «Лочин» жамоаси биринчи ўринни эгаллади.

Кегейли туманидаги 41-мактабнинг «Лочин» жамоаси иккинчи, Тахтакўпир туманидаги 2-мактабнинг «Бургутлар» жамоаси учинчи ўринни эгаллади.

Тақдирлаш маросимида ғолиб ва совриндорлар ташкилотчилар томонидан кубок, медаль, диплом, фахрий ёрлиқ ва эсдалик совғалари билан тақдирланди.

«Энг кучли спортчи,» «Энг яхши мерган,» «Энг билимдон иштирокчи,» «Энг яхши ижрочи,» «Энг яхши ихтирочи» каби алоҳида номинациялар бўйича ҳам ғолиблар тақдирланди.

Мусобақада ғолиб бўлган Қонликўл тумани жамоаси мусобақанинг финал босқичига йўлланма олди.

Қорақалпоғистон ахборот агентлиги