Nókis garnizonındaǵı áskeriy bólimlerdiń birinde “Vatanparvarlar” jarısınıń Qaraqalpaqstan Respublikalıq basqıshı ótkerildi. Oǵan respublikamızdıń 17 qala hám rayonlarınan eń saylandı komandalar qatnasıp, salamat báseki ortalıǵında kúsh sınasıw, bilimin, qábiletin hám kúsh-ǵayratın kórsetiw imkaniyatına iye boldı.

Ózbekstan Respublikası Qorǵanıw, Ishki isler hám Ayrıqsha jaǵdaylar ministrlikleri, Jaslar isleri agentligi, Mámleketlik qáwipsizlik xızmeti, Milliy gvardiya, Jaslar awqamı oraylıq keńesi, Mektepke shekemgi hám mektep bilimlendiriwi ministrligi, “Vatanparvar” shólkemi oraylıq keńesi hám basqa da mámleketlik jámiyetlik shólkemlerdiń 2024-jılǵı birgeliktegi qararına muwapıq, mámleketimizdegi barlıq ulıwma orta bilim beriw mekteplerindegi “Watan tayanıshı” otryadlarına aǵza bolǵan pitkeriwshi klass oqıwshıları arasında Qorǵanıw ministriniń kubogi ushın ótkerilip atırǵan “Vatanparvarlar” áskeriy-sport jarısı jaslarda áskeriy xızmetke qızıǵıwshılıq oyatıp, olardı watansúyiwshilik ruwxında tárbiyalawǵa úles qospaqta.
Oqıwshılardaǵı tolqınlanıw, jeńiske bolǵan isenimi, bellesiwdiń hár bir shártinde ayqın kózge taslandı.
Hár bir komanda aǵzaları ózine tán áskeriy kiyimlerde maqtanıshlı sap tartıp, kúshli báseki ushın ózlerin ruwxıy jaqtan tayarladı. Qatań tártip-intizam hám jeńiske bolǵan kúshli umtılıs bellesiwdiń hár bir sekundın sezimge, kúsh-ǵayratqa toltırdı.
Jarıstıń ashılıw máresiminde Arqa-Batıs áskeriy okrugi áskerleri sárkardalıǵı, Qaraqalpaqstan Respublikası Mektepke shekemgi hám mektep bilimlendiriwi ministrligi, Jaslar awqamı Qaraqalpaqstan Respublikalıq keńesi hám “Vatanparvar” shólkemi Qaraqalpaqstan Respublikası keńesiniń aǵzaları hám basqa da mámleketlik, jámiyetlik shólkemlerdiń wákilleri, shaqırıwǵa shekemgi jaslardı tayarlaw páni muǵallimleri hám oqıwshılar qatnastı.
Shıǵıp sóylegenler jarıs qatnasıwshılarına jaqsı tileklerin bildirdi.
Oqıwshı-jaslardı áskeriy-ámeliy sport jarıslarına keńnen tartıw arqalı olardıń bos waqıtların mazmunlı shólkemlestiriw, óz-ara mádeniy-sport baylanısların jolǵa qoyıw hám jaslardı sport oyınlarına keńnen tartıw, salamat turmıs tárizine ádetleniwge úyretiw, ruwxıy hám fizikalıq jaqtan salamat, bárkamal áwladtı tárbiyalawǵa qaratılǵan bul jarıs bes jıl ishinde jaslar arasında mıńlaǵan ıqlasbentlerin jıynap úlgerdi.
2021-jılǵı “Vatanparvarlar” áskeriy-sport jarıslarınıń final basqıshınıń juwmaǵı boyınsha Qaraqalpaqstan Respublikasınıń abırayın qorǵaǵan Kegeyli rayonınıń jasları sıylı birinshi orındı iyelep, Qorǵanıw ministri kubogin birinshilerden bolıp qolǵa kirgizgenin atap ótiw orınlı.
Al, 2024-jılı Qaraqalpaqstan Respublikasınıń shetki aymaqlarınan biri – Qanlıkól rayonındaǵı mekteptiń “Lashın” komandası jarıstıń final basqıshında minberdiń eń joqarı tekshesinen orın alıp, Qorǵanıw ministri kubogin ekinshi márte jeńip aldı.
Jarıs nızamshılıǵına bola bellesiwde hár bir komandadan 7 ul hám 3 qızdıń qatnasıwına ruxsat berilgen. Áskeriy-sport jarısınıń “Mergenler bellesiwi” dep atalǵan 1-shárti boyınsha jaslar sport mıltıǵınan qadaǵalaw atıw shınıǵıwı arqalı mergenlik sheberligin kórsetti. 5 ul bala qatnasqan “Turnikte tartılıw” shártinde 4 minut waqıt ishinde kúshlerin sınap kórip, eń kóp nátiyje jazıwı kerek edi.
“Áskeriylestirilgen estafeta” dep atalǵan 3-shártte qatnasıwshılar avtomattı tolıq bolmaǵan bóleklerge ajıratıwı hám jıynawı, gazge qarsı nıqaptı kiyiwi hám oq-dári qutısın kóterip juwırıwı kerek edi. Bul shártte komandadan 4 qatnasıwshı qatnastı.
Jarıstıń “Jábirleniwshige birinshi járdem kórsetiw” dep atalǵan 4-shártinde eki qatnasıwshı 50 metr aralıqqa zámberdi kótergen halda juwıradı hám finishte jatqan shártli jábirleniwshige birinshi tez medicinalıq járdem kórsetedi. Bunnan soń jábirleniwshini zámberge kóterip, finishke qaray juwırıladı.
“Sapta qosıq aytıw” dep atalǵan keyingi shártte komandalar sapta qádem taslap, áskeriy qosıqlardı janlı atqarıwı belgilengen. Onda sap elementlerin reje qaǵıydaları tiykarında orınlawı, sapta júriwi, qosıq aytıwı, kiyim-kenshekleri ushın hár bir komanda bahalandı.
“Bilimdanlar” dep atalǵan shártte oqıwshılar elektron programma arqalı Jalaladdin Manguberdi, Ámir Temur, Zahriddin Muhammed Baburdıń áskeriy xızmeti, Oraylıq Aziya mámleketshiligi tariyxı hám Ózbekstan tariyxı boyınsha 15 ten 30 ǵa shekemgi test sorawlarına juwap beriwi hám olardıń hár biri ushın qosımsha ball alıwı múmkin boldı.
“Watan gimni” kórkem-háweskerlik tańlawında komandalardıń kórkem óner sheberligi sınaqtan ótkeriledi. Onda keminde 5 quramda qatnasqan qatnasıwshılar komandalıq hám jeke tártipte watan súyiwshilik ruwxındaǵı milliy qosıqlardı aytıp, ózleriniń sheberliklerin kórsetti.
“Arqaǵa jatqan jaǵdaydan deneni kóteriw,” yaǵnıy qarın bulshıq etlerine (press) shınıǵıwlardı orınlaw shártinde de barlıq qatnasıwshılar salamat turmıs tárizin tańlap, sport penen tanıs ekenligin kórsete aldı.
“Arqan tartısıw” bellesiwinde jaslar komandada bir jaǵadan bas shıǵarıp birgelikte islewin kórsetip, básekilesti.
Bıyılǵı jarıs rejesine kirgizilgen jańa shártlerden biri, yaǵnıy “Smart sardor” oylap tabıwshılıq tańlawında qatnasıwshılar ózleri oylap tapqan robototexnika yamasa basqa da zamanagóy joybarlardı usınıwı kirgizilgen. Tańlawdıń tiykarǵı maqseti sıpatında jas áwladta joqarı texnologiyalar tarawına qızıǵıwshılıq oyatıw, olardıń potencialın júzege shıǵarıwǵa járdemlesiwden ibarat.
Jarıstıń hár bir shártinde qatnasıwshılardıń is-háreketleri waqıt ólshemi menen ádil bahalaw mexanizmi tiykarında bahalanıp barıldı.
Esletip ótemiz, Qaraqalpaqstan Respublikasındaǵı 710 mektep hám 20 qánigelestirilgen mekteplerde 723 “Watan tayanıshı” otryadları jumıs alıp barıp, olarda 8293 ul bala hám 3939 qız bala, jámi 12 232 aǵza bar.
Jarıstıń jabılıw máresiminde shıǵıp sóylegenler búgingi kúnde mámleketimiz jaslarına qaratılıp atırǵan itibardı, olardı áskeriy-watansúyiwshilik ruwxında tárbiyalawdaǵı jetiskenliklerdi atap ótip, áskeriy okrug aymaǵında mine usınday ilajlardı ótkeriw ushın barlıq sharayatlar bunnan bılay da jaratıp beriletuǵının atap ótti.
Jarıs shártleri boyınsha ayrıqsha kórsetkishlerge erisken oqıwshı-jaslar hám komandalar sıylıqlandı. Oǵan bola “Eń kúshli sportshı,” “Eń jaqsı mergen,” “Eń jaqsı bilimdan,” “Eń jaqsı atqarıwshı” hám “Eń jaqsı oylap tabıwshı” sıyaqlı bir qatar nominaciyalar boyınsha jaslar jeke tártipte hám komandalıq tártipte sıylıqlandı.
Barlıq shártler boyınsha joqarı nátiyje kórsetken Qanlıkól rayonındaǵı 2-sanlı mekteptiń “Lashın” komandası birinshi orındı iyeledi.
Kegeyli rayonındaǵı 41-sanlı mekteptiń “Lashın” komandası ekinshi, Taxtakópir rayonındaǵı 2-sanlı mekteptiń “Búrkitler” komandası úshinshi orındı iyeledi.
Sıylıqlaw máresiminde jeńimpaz hám sıylı orın iyeleri shólkemlestiriwshiler tárepinen kubok, medal, diplomlar, húrmet jarlıqları hám estelik sawǵaları menen sıylıqlandı.
“Eń kúshli sportshı,” “Eń jaqsı mergen,” “Eń bilimli qatnasıwshı,” “Eń jaqsı atqarıwshı,” “Eń jaqsı oylap tabıwshı” sıyaqlı ayrıqsha nominaciyalar boyınsha da jeńimpazlar sıylıqlandı.
Jarısta jeńimpaz bolǵan Qanlıkól rayonı komandası jarıstıń final basqıshına jollama aldı.

Qaraqalpaqstan xabar agentligi