“Ўзағросуғурта” акциядорлик жамияти, Ўзбекистон суғурта бозорининг етакчи иштирокчиларидан бири сифатида, дунёдаги энг нуфузли рейтинг агентликларидан бири — Moody’s Investors Service томонидан “Ba3” даражасида узоқ муддатли молиявий барқарорлик рейтингига сазовор бўлди. Рейтинг прогнози — “барқарор”.

Moody’s томонидан эълон қилинган ҳисоботда қайд этилишича, “Ba3” рейтинги компаниянинг қуйидаги асосий устунликларини акс эттиради:

•  Ўзбекистон суғурта бозоридаги мустаҳкам позицияси;

•  Капитал базасининг ишончлилиги ва захираларининг етарлилиги;

•  Суғурта портфелининг диверсификацияланганлиги;

•  Давлат томонидан кўрсатилаётган қўллаб-қувватлаш, бу эса қўшимча молиявий барқарорликни таъминлайди.

Ушбу ютуқ компаниянинг барқарор ривожланаётганлигини яна бир бор тасдиқлади. “Ўзағросуғурта” АЖ “Ахбор-Рейтинг” агентлиги томонидан “uzA++” рейтингига эга бўлиб, унга “барқарор” прогнози берилган. Шунингдек, компания сифат менеджменти тизими бўйича ISO 9001:2015 халқаро стандартларига мувофиқлигини тасдиқловчи сертификатга ҳам эга.

Бу жамиятнинг корпоратив бошқарувдаги шаффофликка риоя қилаётганини, ҳамда миллий ва халқаро миқёсда ишончли ҳамкор сифатидаги мақомини мустаҳкамлаб бораётганини кўрсатади.

Moody’s Ratings томонидан берилган ушбу халқаро кредит рейтинги “Ўзағросуғурта” АЖ томонидан тақдим этилаётган суғурта хизматларига хорижий инвесторлар ва маҳаллий мижозлар ишончини янада оширишга хизмат қилади.