Ўзбекистон Республикаси Судьялар олий кенгаши, Оила ва хотин-қизлар қўмитаси ҳамда Қорақалпоғистон Республикаси судлари ҳамкорлигида Нукус шаҳрида оилалар мустаҳкамлигини таъминлаш ва фарзандлар тарбиясига бағишланган амалий тадбир бўлиб ўтди.

Тадбирга нотинч оилада яшаётган, ажрим арафасида турган, судга ажрим бўйича шикоят аризаси билан мурожаат қилган эр-хотинлар ва уларнинг ота-оналари таклиф этилди.

Тадбир ноанъанавий усулда бошланиб, дастлаб бир оиланинг никоҳдан ажрашгандан кейинги тақдири акс этган «Фарзанд омонат» номли қисқа метражли кинофильм намойиш этилди. Фақатгина 20 дақиқагача давом этган фильм йиғилганларни бефарқ қолдирмади, кўпчилик кўз ёшларини тия олмади.

Натижада, фильм тақдимотидан хулоса чиқарган 12 та хонадон тикланди. Ажрашиб, аразлашиб, судлашиб юрган эр-хотинларнинг ярашгани бир тараф, уларнинг ота-оналари, фарзандларининг қувончи бир тараф бўлди. Энг асосийси, бу оилалардаги жами 22 нафар фарзанд энди ота-она бағрида камолга етадиган бўлди.

Ўзбекистон Республикаси Судьялар олий кенгаши раиси томонидан Қорақалпоғистон Республикаси фуқаролик ишлари бўйича судларига оилаларнинг мустаҳкамлиги, ундаги соғлом муҳитнинг жамиятимизнинг эртанги кунига ижобий таъсирини ҳисобга олган ҳолда никоҳдан ажратиш ишларини судда кўришда эр-хотиннинг ота-оналари ва кенг жамоатчилик вакиллари, шу жумладан, маҳалла, Оила ва хотин-қизлар қўмитасининг жойлардаги вакиллари иштирокини таъминлашга эътиборли бўлиш, бундай тадбирларни ҳудудлар кесимида ўтказиб бориш тавсия этилди.

Тадбирда иштирокчиларнинг фикр-мулоҳазалари ҳам тингланиб, улар ўзларини қизиқтирган саволларга жавоб олди.

А.Жийемуратов,

Қорақалпоғистон ахборот агентлиги