Ózbekstan Respublikası Sudyalar joqarǵı keńesi, Shańaraq hám hayal-qızlar komiteti hám Qaraqalpaqstan Respublikası sudları menen birgelikte Nókis qalasında shańaraqlardıń bekkemligin támiyinlew hám perzentler tárbiyasına baǵıshlanǵan ámeliy ilaj bolıp ótti.

Ilajǵa tınıshsız shańaraqta jasap atırǵan, ajırasıw aldında turǵan, sudqa ajırasıw boyınsha shaǵım arza menen múrájat etken erli-zayıplılar hám olardıń ata-anaları mirát etildi.
Ilaj dástúriy emes usılda baslanıp, dáslep bir shańaraqtıń nekeden ajırasqannan keyingi táǵdiri sáwlelengen “Perzent amanat” atlı qısqa metrajlı kinofilm qoyıp berildi. Tek ǵana 20 minutqa shekem dawam etken film jıynalǵanlardı biypárwa qaldırmadı, kópshilik kóz jasların tıya almadı.
Nátiyjede, filmniń prezentaciyasınan juwmaq shıǵarǵan 12 shańaraq tiklendi. Ajırasıp, ókpelesip, sudlasıp júrgen erli-zayıplılardıń jarasqanı bir tárep, olardıń ata-anaları, perzentleriniń quwanıshı bir tárep boldı. Eń tiykarǵısı, bul shańaraqlardaǵı jámi 22 perzent endi ata-ana qushaǵında kamalǵa keletuǵın boldı.
Ózbekstan Respublikası Sudyalar joqarǵı keńesiniń baslıǵı tárepinen Qaraqalpaqstan Respublikası puqaralıq isleri boyınsha sudlarına shańaraqlardıń bekkemligi, ondaǵı salamat ortalıqtıń jámiyetimizdiń erteńgi kúnine unamlı tásirin esapqa alǵan halda nekeden ajıratıw islerin sudta kóriwde erli-zayıplılardıń ata-anaları hám keń jámiyetshilik wákilleri, sonıń ishinde, máhálle, Shańaraq hám hayal-qızlar komitetiniń orınlardaǵı wákilleriniń qatnasıwın támiyinlewge itibarlı bolıw, bunday ilajlardı aymaqlar kesiminde ótkerip barıw usınıs etildi.
Ilajda qatnasıwshılardıń pikir-usınısları da tıńlanıp, olar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.