АҚШ Давлат котиби Марко Рубио Жанубий Судан ҳукумати депортация қилинган фуқароларини қабул қилмагани учун ушбу мамлакат паспорти эгаларига берилган визаларни дарҳол бекор қилганини эълон қилди.

Унга кўра, АҚШ энди Жанубий Судандан келган фуқароларни ўз ҳудудига киритмайди. Рубио Жанубий Судан ҳукуматини фуқароларини ўз вақтида қабул қилмасликда айблади.

Бу қарор Жанубий Суданда фуқаролик уруши қайта бошланиши мумкинлиги ҳақида хавотирлар кучайган вақтда чиқди. АҚШ элчихонаси 8-март куни ўз ходимларига мамлакатни тарк этишни буюрди.

Шунингдек, АҚШда вақтинчалик ҳимоя (TPS) мақомида бўлган жанубий суданликларнинг келажаги ҳам ноаниқ бўлиб қолмоқда. Вақтинчалик ҳимоя муддати 3-май куни якунланади.

Мазкур қарор Dyuk университетида таҳсил олаётган ва АҚШдаги машҳур жанубий суданликлардан бири — баскетболчи Хаман Малуачнинг ҳам ҳолатига таъсир қилиши мумкин. Университет расмийлари вазиятни ўрганаётганини билдирган.