Ўзбекистон Республикаси Ветеринария ва чорвачиликни ривожлантириш давлат қўмитаси ташаббуси билан муҳим экологик тадбир ўтказилди.

Самарқанд давлат ветеринария медицинаси, чорвачилик ва биотехнологиялар университети, унинг Нукус ва Тошкент филиаллари раҳбарлари, профессор-ўқитувчилари, тюторлар ва талаба-ёшлари томонидан Мўйноқ туманида 5000 туп саксовул кўчати экилди.

Ушбу тадбир «Яшил макон» лойиҳаси доирасида амалга оширилган бўлиб, асосий мақсад – экологик муҳитни яхшилаш, Оролбўйи ҳудудида яшил майдонларни кўпайтириш ва атроф-муҳит барқарорлигини таъминлашдир. Саксовул ўсимлиги чўл ҳудудлари учун жуда муҳим бўлиб, у тупроқ эрозиясининг олдини олиш, қум ва чанг бўронларини камайтириш ҳамда экологик барқарорликни сақлашда муҳим аҳамиятга эга.

Тадбир давомида олий таълим муассасалари вакиллари биргаликда кўчат экиш жараёнида фаол иштирок этиб, атроф-муҳитга бўлган эътибор ва масъулиятни янада оширди. Бундан ташқари, талаба-ёшлар ўз билимларини амалиётда синовдан ўтказиш имкониятига эга бўлди.Шунингдек, туманда ўтказилган ушбу ижтимоий-экологик тадбир талаба-ёшларнинг атроф-муҳитга бўлган масъулиятини ошириш билан бирга, уларни жамоат ишларига ҳам ундайди.

Қорақалпоғистон ахборот агентлиги