Ózbekstan Respublikası Veterinariya hám sharwashılıqtı rawajlandırıw mámleketlik komitetiniń baslaması menen áhmiyetli ekologiyalıq ilaj ótkerildi.

Samarqand mámleketlik veterinariya medicinası, sharwashılıq hám biotexnologiyalar universiteti, onıń Nókis hám Tashkent filiallarınıń basshıları, professor-oqıtıwshıları, tyutorlar hám student-jaslar tárepinen Moynaq rayonında 5000 túp seksewil náli egildi.
Bul ilaj “Jasıl mákan” joybarı sheńberinde ámelge asırılǵan bolıp, tiykarǵı maqset – ekologiyalıq ortalıqtı jaqsılaw, Aralboyı aymaǵında jasıl maydanlardı kóbeytiw hám qorshaǵan ortalıqtıń turaqlılıǵın támiyinlew bolıp esaplanadı. Seksewil ósimligi shól aymaqları ushın oǵada áhmiyetli bolıp, ol topıraq eroziyasınıń aldın alıw, qum hám shań boranların azaytıw jáne ekologiyalıq turaqlılıqtı saqlawda úlken áhmiyetke iye.
Ilaj dawamında joqarı oqıw orınları wákilleri birgelikte nál egiw procesinde belsene qatnasıp, qorshaǵan ortalıqqa bolǵan itibar hám juwapkershilikti jáne de arttırdı. Bunnan tısqarı, student-jaslar óz bilimlerin ámeliyatta sınaqtan ótkeriw imkaniyatına iye boldı. Sonday-aq, rayonda ótkerilgen bul sociallıq-ekologiyalıq ilaj student-jaslardıń qorshaǵan ortalıqqa bolǵan juwapkershiligin arttırıw menen birge, olardı jámiyetlik jumıslarǵa da iytermeleydi.

Qaraqalpaqstan xabar agentligi