Ҳосилнинг баракали бўлишини яхши ниятлар билан бошлаган деҳқонларимиз Беруний туманида плёнка остига чигит экишни бошлади.

«Beruniy cluster» МЧЖга қарашли экин майдонида амалга оширилаётган ишлар доирасида кўргазмали семинар ўтказилиб, плёнка остига чигит экиш усуллари кўрсатилиб, мутахассислар томонидан тегишли маълумотлар берилиб афзалликлари таъкидланди.

Семинарда Қорақалпоғистон Республикаси Вазирлар Кенгаши Раисининг ўринбосари Ш.Тешаев сўзга чиқиб, бу борада амалга ошириладиган ишларга кенг тўхталиб ўтди.

Тадбирда техникалардан самарали фойдаланиш, сув тежовчи технологияларни ўрнатиш, ҳосилга ўз вақтида агротехник тадбирларни қўллаш ҳамда чигит экиш мавсумида иштирок этадиган механизаторларга дала бошида шароит яратиб бериш бўйича муҳим топшириқлар берилди.

Маълумот учун, 2025 йилги экиш мавсумида Беруний туманида 8500 гектар майдонга чигит экиш режалаштирилган бўлиб, хусусан, хорижий навлар, «Султон» нави, «Бухоро» навлари экилиши белгиланган.

Кўргазмали семинарда иштирок этган фермерлар билан ҳамкорликда дала майдонига чигит уруғлари экилди.

Қорақалпоғистон ахборот агентлиги