Zúrááttiń bereketli bolıwın jaqsı niyetler menen baslaǵan diyqanlarımız Beruniy rayonında plyonka astına shigit egiwdi basladı.

“Beruniy cluster” JShJ ǵa qaraslı egislik maydanında ámelge asırılıp atırǵan jumıslar sheńberinde kórgizbeli seminar ótkerilip plyonka astına shigit egiw usılları kórsetilip, qánigeler tárepinen tiyisli maǵlıwmatlar berilip abzallıqları atap ótildi.
Seminarda Qaraqalpaqstan Respublikası Ministrler Keńesi Baslıǵınıń orınbasarı Sh.Teshaev shıǵıp sóylep, bul baǵdarda ámelge asırılatuǵın jumıslarǵa keńnen toqtap ótti.
Ilajda texnikalardan nátiyjeli paydalanıw, suwdı únemleytuǵın texnologiyalardı ornatıw, jetistiriletuǵın ónimge óz waqtında agrotexnikalıq ilajlardı qollanıw hám shigit egiw máwsiminde qatnasatuǵın mexanizatorlarǵa atız basında sharayatlar jaratıp beriw boyınsha áhmiyetli tapsırmalar berildi.
Maǵlıwmat ushın, 2025-jılǵı egislik máwsimde Beruniy rayonında 8500 gektar maydanǵa shigit egiw rejelestirilgen bolıp, atap aytqanda, sırt el sortları, “Sultan” sortı, “Buxara” sortlarınıń egiliwi belgilengen.
Kórgizbeli seminarda qatnasqan fermerler menen birgelikte atız maydanına shigit tuqımları egildi.

Qaraqalpaqstan xabar agentligi