Ўзбекистоннинг Сан-Маринога тайинланган биринчи элчиси Абат Файзуллаев (қароргоҳи Римда жойлашган) мазкур давлат раҳбарлари – Капитан-регентлар Франческа Чиверкья ва Далибор Риккардига ишонч ёрлиқларини топширди.

Тантанали маросимда Сан-Марино ташқи ишлар вазири Лука Беккари сўзга чиқиб, аккредитациядан ўтган элчиларни олқишлади.

Вазир Лука Беккари давлатимиз раҳбари ташаббуси билан мамлакатимизда олиб борилаётган кенг кўламли иқтисодий ва демократик ислоҳотларни, Ўзбекистон ва Сан-Марино ўртасидаги алоқаларни ривожлантиришга қаратилган саъй-ҳаракатларни, жумладан ушбу мамлакатга биринчи элчининг тайинланишини юқори баҳолади. Шунингдек, юртимизнинг иқлим ва атроф-муҳит билан боғлиқ муаммоларга қарши курашишда ҳамда барқарор ривожланиш йўлида олиб борилаётган оқилона сиёсати алоҳида эътироф этилди.

Ўзаро савдо-иқтисодий ҳамкорликни ривожлантириш, икки томонлама шартнома-ҳуқуқий базани мустаҳкамлаш, кўп томонлама ҳамкорлик йўналишида, хусусан, БМТ ва ЕХҲТ доирасида номзодлар ва ташаббусларни ўзаро қўллаб-қувватлаш каби мавжуд манфаатли шерикликни давом эттиришга ишонч билдирилди.

Маълумот ўрнида айтиш жоиз, мамлакатларимиз ўртасидаги дипломатик муносабатлар 2021 йил 3 февралда ўрнатилган. Сан-Марино дунёдаги энг кичик давлатлардан бири бўлиб, Жанубий Европа минтақасида жойлашган.

Эслатиб ўтамиз, Абат Файзуллаев 2023 йил ноябрь ойидан буён диёримизнинг Италиядаги элчиси ва Римдаги халқаро ташкилотлар (ФАО, ҚХРХЖ, БООД) ҳузуридаги доимий вакили ҳамда 2024 йил декабрь ойидан бошлаб Ўзбекистоннинг Кипрдаги элчиси сифатида фаолият юритиб келмоқда.

Абат Файзуллаев 2020-2023 йилларда ўлкамизнинг Австриядаги ва ўриндошлик асосида Венгриядаги элчиси сифатида ишлаган. У бир вақтнинг ўзида Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлар ҳузуридаги доимий вакили лавозимида ҳам фаолият олиб борган.

ЎзА