Ўзбекистон Республикаси Вазирлар Маҳкамаси “Корпаратив буюртмачиларнинг тадбиркорлик субъектлари билан кооперация алоқаларини  ўрнатиши ва давлат харидлари жараёнида ишлаб чиқарувчиларни рағбатлантириш чора-тадбирлари тўғрисида” қарор қабул қилди.

Унга мувофиқ, Корпоратив буюртмачиларнинг тадбиркорлик субъектлари билан кооперация алоқаларини ўрнатиш ва ушбу жараёнда давлат харидларини амалга ошириш тартиби тўғрисидаги низом тасдиқланди.

Низомда: 

корпоратив буюртмачилар томонидан импорт қилиниши режалаштирилган маҳсулотлар рўйхатини шакллантириш ва эълон қилиш;

кооперация алоқаларини ўрнатиш учун тадбиркорлик субъектлари таклифларини қабул қилиш тартиби ва уларни баҳолаш мезонларини белгилаш;

тадбиркорлик субъекта билан кооперация алоқаларини ўрнатиш бўйича битим тузиш;

кооперация алоқаларини ўрнатган тадбиркорларнинг маҳсулотларини давлат буюртмачиларига сотиш имкониятларини яратиш тартиблари белгилаб берилган.

Қарорга кўра, “Кичик бизнесга кўмаклашиш маркази” МЧЖ кичик тадбиркорлик субъектларига кооперация алоқаларини ўрнатиш бўйича бизнес лойиҳаларини ишлаб чиқишга кўмаклашади. Кооперация алоқаларини ўрнатиш учун давлат харидлари бўйича махсус ахборот порталида очилган алоҳида саҳифага зарур бўлган маълумотлар интеграция қилинади.

Энг яхши таклифларни танлаш ва тендер савдоларида (корпоратив буюртмачилар томонидан тижорат мақсадларида қайта сотиш ёки шу мақсадларда товарлардан ишлаб чиқаришда фойдаланиш учун амалга ошириладиган давлат харидларидан ташқари) ишлаб чиқарувчиларнинг таклифларини баҳолашда “балл усули”дан фойдаланганда уларга қўшимча балл бериш тизими жорий этилади.

Маълумот учун. Ўзбекистон Республикаси Президентининг “Ўзбекистон Республикаси Президентининг тадбиркорлар билан тўртинчи очиқ мулоқотида белгиланган вазифаларни амалга ошириш чора-тадбирлари тўғрисида” 2024 йил 30 августдаги ПФ-132-сон фармонига мувофиқ:

янги турдаги маҳсулотларни ишлаб чиқаришни йўлга қўйиш мақсадида тадбиркорлик субъектлари билан кооперация алоқаларини ўрнатиш орқали кафолатланган тарзда харид қилишнинг замонавий тизимини жорий қилиш;

давлат харидларини амалга оширишда товарнинг ўзлаштириш даражасидан келиб чиқиб, ишлаб чиқарувчиларни рағбатлантириш тизимини йўлга қўйиш белгиланган эди.

ЎзА