Ózbekstan Respublikası Ministrler Kabineti «Korporativ buyırtpashılardıń isbilermenlik subektleri menen korporaciya baylanısların ornatıwı hám mámleketlik satıp alıwlar procesinde islep shıǵarıwshılardı qollap-quwatlaw ilajları haqqında»ǵı qarar qabıl etti.

Oǵan muwapıq, Korporativ buyırtpashılardıń isbilermenlik subektleri menen kooperaciyalıq baylanıslardı ornatıw hám bul processte mámleketlik satıp alıwlardı ámelge asırıw tártibi haqqındaǵı reje tastıyıqlandı.
Rejede:
korporativ buyırtpashılar tárepinen import etiliwi rejelestirilgen ónimler dizimin qáliplestiriw hám járiyalaw;
kooperaciyalıq baylanıslardı ornatıw ushın isbilermenlik subektleriniń usınısların qabıllaw tártibi hám olardı bahalaw normaların belgilew;
isbilermenlik subekti menen kooperaciyalıq baylanıslardı ornatıw boyınsha kelisim dúziw;
kooperaciyalıq baylanıslardı ornatqan isbilermenlerdiń ónimlerin mámleketlik buyırtpashılarǵa satıw imkaniyatların jaratıw tártipleri belgilep berilgen.
Qararǵa bola, «Kishi bizneske járdemlesiw orayı» JShJ kishi isbilermenlik subektlerine kooperaciyalıq baylanıslardı ornatıw boyınsha biznes joybarların islep shıǵıwǵa járdemlesedi. Kooperaciyalıq baylanıslardı ornatıw ushın mámleketlik satıp alıwlar boyınsha arnawlı málimleme portalında ashılǵan ayrıqsha betke zárúr bolǵan maǵlıwmatlar integraciyalanadı.
Eń jaqsı usınıslardı tańlaw hám tender sawdalarında (korporativ buyırtpashılar tárepinen kommerciyalıq maqsetlerdi qayta satıw yamasa usı maqsetlerde tovarlardan óndiriste paydalanıw ushın ámelge asırılatuǵın mámleketlik satıp alıwlardan tısqarı) islep shıǵarıwshılardıń usınısların bahalawda «ball usılı»nan paydalanǵanda olarǵa qosımsha ball beriw sisteması engiziledi.
Maǵlıwmat ushın. Ózbekstan Respublikası Prezidentiniń «Ózbekstan Respublikası Prezidentiniń isbilermenler menen tórtinshi ashıq sóylesiwinde belgilengen wazıypalardı ámelge asırıw ilajları haqqında»ǵı 2024-jıl 30-avgusttaǵı PP-132-sanlı pármanına muwapıq:
jańa túrdegi ónimlerdi islep shıǵarıwdı jolǵa qoyıw maqsetinde isbilermenlik subektleri menen kooperaciyalıq baylanıslardı ornatıw arqalı kepillengen túrde satıp alıwdıń zamanagóy sistemasın engiziw;
mámleketlik satıp alıwlardı ámelge asırıwda tovardıń ózlestiriw dárejesinen kelip shıǵıp, islep shıǵarıwshılardı qollap-quwatlaw sistemasın jolǵa qoyıw belgilengen edi.

ÓzA