Хитойнинг CRRC Corporation Limited корпорацияси дунёдаги энг тезкор поезд бўлишга даъвогарлик қилаётган CR450 прототипини синовдан ўтказишни бошлади.

Пекиндаги экспериментал темирйўл ҳалқасида янги юқори тезликдаги электр поезди илк бор синовдан ўтказилди. Бу ҳақда ишлаб чиқарувчи компания вице-президенти Ван Фен “Science and Technology Daily” газетасига маълум қилди

Янги таркиблар ҳозирда фойдаланилаётган ва 350 км/соат тезликка эриша оладиган CR400 Fuxing поездларига қараганда анча юқори тезлик билан ажралиб туради. Ван Феннинг сўзларига кўра, CR450  юқори тезликдаги поездлар назарияси, технологияси, ускуналари, стандартлари ва бошқарув тизимида комплекс ютуқ ҳисобланади.

Хитой Транспорт вазирлиги маълумотларига кўра, CR450  модели синов давомида 450 км/соат тезликка эришган. Поезд турли тизимлар ва технологиялар бўйича батафсил баҳоланмоқда.

Шунингдек, поездга 4 мингдан ортиқ мониторинг датчиклари ўрнатилган бўлиб, улар реал вақт режимида асосий тизимларни – юриш механизмлари, кузов, юқори кучланишли ток қабул қилувчилар, ҳаракат бошқаруви ва ёнғинни аниқлаш тизимларини кузатиб боради. Бундан ташқари, ультра узоқ масофани аниқлаш қурилмаси хавфли вазиятларни олдиндан сезиш имкониятини оширади.

Экспертлар тахминига кўра, CR450   илк йўловчиларни камида бир йилдан кейин таший бошлайди.

Мадинабону Насриева, Улуғбек Тўхтаев (видео), ЎзА