Коррупция – жамият тараққиётига салбий таъсир кўрсатувчи омиллардан бири. Жиноятчиликнинг бу турига қарши сўнгги йилларда кескин кураш олиб борилмоқда. Давлатимиз раҳбарининг куни кеча Коррупцияга қарши курашиш миллий кенгаши йиғилишида иштирок этгани ва мамлакатимизда коррупциядан холи муҳит яратиш бўйича қилинган ишларга баҳо берилгани ҳам бежиз эмас.

Президентимиз таъкидлаганидек, коррупция ислоҳотлар йўлидаги энг катта тўсиқ ва ғов демакдир. Шу боис бу иллатга қарши курашувчи алоҳида идоралар ташкил этилди. Жамоатчилик олдига ҳам коррупцияга йўл қўймаслик вазифаси қўйилди. Коррупциянинг асосий омилларига қарши кураш кучайтирилди.

Шу ўринда бир мисол, илгари банклардан кредит олишда ҳам таниш-билишчилик бўлган. Энди тизимда шундай тартиб ўрнатилдики, ҳаммаси очиқ-ойдин ечимини топаяпти. Барча банклар 100 миллион сўмгача хўжалик кредитларини инсон омилисиз 5 дақиқада онлайн бермоқда. Натижада илгари бу иш билан шуғулланган минглаб банкирлар энди маҳаллага тушиб, одамларга лойиҳа, кредит таклиф қилиб, мижозини кўпайтириш билан шуғулланмоқда. Бу ўз-ўзидан фуқароларнинг банкларга бўлган ишончини ошириш билан бирга янги ташаббусларга, тадбиркорлик фаолиятига йўл очмоқда.

Мактабни битираётган йигит-қизлар ва уларнинг ота-оналарини бир ташвиш қийнар эди. Фарзандини олий ўқув юртига ўқишга киритиши учун ота-она олдиндан пул йиққани ҳам сир эмас. Бу коррупциянинг очиқ кўринишининг бошланиши. Сўнгги йилларда амалга оширилган ислоҳотлар натижасида олий таълим тизими рақамлаштирилди. Аввал тест топшириб, тўплаган балига қараб, кейин олий ўқув юртига танлов жорий этилди. 35 турдаги ҳужжатларни инсон омилисиз олишга ўтилгани учун соҳадаги мурожаатлар 2,2 баробарга камайди. Буларнинг барчаси ёшларни ўз устида ишлашга, билим олишга ва очиқликка ўргатмоқда.

Бизнинг партиямиз ўз номи билан жамиятда адолат ўрнатиш тарафдори. Коррупцияга қарши курашиш биз учун доимий жараён ва фаолиятимизда кенг ўрин эгаллайди. Бу йўлда давлатимиз раҳбари айтганидек, барчамиз бир тану бир жон бўлиб ҳаракат қилсак, албатта, катта ижобий натижага эришамиз. Шунинг учун маҳалла фаоллари, нуронийлар, зиёлилар, ёзувчи ва шоирлар, санъат ва маданият ходимлари, тадбиркорлар, таниқли шахслар, раҳбарлар, депутат ва сенаторлар – умуман, бутун жамоатчилик бирлашиб, коррупцияга «жамият танасидаги саратон» сифатида қараши керак.

Мухтар Ибрагимов, Қорақалпоғистон Республикаси Жўқорғи Кенгеси депутати, ЎзЛиДеП фракцияси аъзоси

Қорақалпоғистон ахборот агентлиги