Múnásibet

Korrupciya – jámiyettiń rawajlanıwına unamsız tásir kórsetiwshi faktorlardan biri. Sońǵı jıllarda mámleketimizde jınayashılıqtıń bul túrine qarsı keskin gúres alıp barılmaqta. Mámleketimiz basshısınıń Korrupciyaǵa qarsı gúresiw milliy keńesiniń májilisinde qatnasıwı hám elimizde korrupciyadan jıraq ortalıq jaratıw boyınsha islengen jumıslarǵa baha berilgeni de tosınnan emes.

Prezidentimizdiń atap ótkenindey, korrupciya reformalar jolındaǵı eń úlken tosqınlıq hám kesent. Sol sebepli bul illetke qarsı gúresiwshi óz aldına uyımlar shólkemlestirildi. Jámiyetshiliktiń aldına da korrupciyaǵa jol qoymaw wazıypası júklendi. Bul qáwipli illetke qarsı gúresiw ushın mámleketimizde bir qatar huqıqıy hújjetler qabıl etilip, onıń tiykarǵı faktorlarına qarsı gúres kúsheytildi.
Usı jerde bir mısal, aldınları banklerden kredit alıwda da tanıs-bilislik bolǵan. Endi sistemada sonday tártip ornatıldı, hámmesi ashıq-aydın sheshimin tawıp atır. Barlıq bankler 100 million sumǵa shekemgi xojalıq kreditlerin insan faktorısız 5 minutta onlayn bermekte. Nátiyjede aldın bul jumıs penen shuǵıllanǵan mıńlaǵan bankirler endi máhállege túsip, adamlarǵa joybar, kredit usınıs etip, qarıydarın kóbeytiw menen shuǵıllanbaqta. Bul óz-ózinen puqaralardıń banklerge bolǵan isenimin arttırıw menen birge jańa baslamalarǵa, isbilermenlik jumısına baslamaqta.
Mektepti pitkerip atırǵan jigit-qızlar hám olardıń ata-anaların bir táshwish qıynar edi. Bir waqıtları perzentin joqarı oqıw ornına oqıwǵa kirgiziw ushın ata-ana aldınnan pul jıynaǵanı da sır emes. Bul korrupciyanıń ashıq kórinisiniń baslanıwı. Keyingi jıllarda ámelge asırılǵan reformalar nátiyjesinde joqarı bilimlendiriw sisteması sanlastırıldı. Dáslep test tapsırıp, toplaǵan ballına qarap, keyin joqarı oqıw ornın tańlaw engizildi. 35 túrdegi hújjetlerdi insan faktorısız alıwǵa ótilgeni ushın tarawdaǵı múrájatlar 2,2 esege azaydı. Bulardıń barlıǵı jaslardı óz ústinde islewge, bilim alıwǵa hám ashıq-aydınlıqqa úyretpekte.

Biziń partiyamız óz atı menen jámiyette ádillik ornatıw tárepdarı. Korrupciyaǵa qarsı gúresiw biz ushın turaqlı process hám jumısımızda keń orın iyeleydi. Bul jolda mámleketimiz basshısı aytqanınday, hámmemiz birden-bir kúsh bolıp háreket etetuǵın bolsaq, álbette, úlken unamlı nátiyjege erisemiz. Sonıń ushın máhálle belsendileri, nuraniyler, zıyalılar, jazıwshı hám shayırlar, kórkem óner hám mádeniyat xızmetkerleri, isbilermenler, belgili shaxslar, basshılar, deputat hám senatorlar – ulıwma pútkil jámiyetshilik birlesip, korrupciyaǵa «jámiyet denesindegi parazit” sıpatında qarawı kerek.

Muxtar Ibragimov, Qaraqalpaqstan Respublikası Joqarǵı Keńesi deputatı, ÓzLiDeP frakciyası aǵzası
Qaraqalpaqstan xabar agentligi