Сенатнинг Бюджет ва иқтисодий масалалар қўмитаси томонидан “Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида”ги қонуннинг мазмун-моҳиятини тушунтириш юзасидан семинар ўтказилди.

Семинарда фуқаролар ҳамда тадбиркорлик субъектларига тегишли бўлган бино ва иншоотлар жойлашган ер участкалари олиб қўйилиши муносабати билан мулкдорларнинг қонуний ҳуқуқ ва манфаатлари кафолатларини янада мустаҳкамлашни таъминлаш ҳамда шу муносабат билан етказилган зарарларни қоплашда йўл қўйилаётган камчиликларни бартараф этиш бўйича масъул вазирлик ва идоралар вакилларининг ахборотлари эшитилди.

Шунингдек, ер участкаларини компенсация эвазига жамоат эҳтиёжлари учун олиб қўйишнинг ҳуқуқий асослари, ер участкаси ва унда жойлашган кўчмас мулк объектлари учун ҳуқуқ эгаларига компенсация ажратиш тартиби ҳамда кўчмас мулк объектларига бўлган ҳуқуқларнинг тугатилиши ҳамда ушбу йўналишдаги мавжуд муаммо ва камчиликлар юзасидан фикр алмашилди.

Муҳокамада маҳаллий кенгашларнинг ер участкасини олиб қўйиш тўғрисидаги қарор лойиҳалари “E-qaror” ягона электрон тизими орқали Қорақалпоғистон Республикаси Адлия вазирлиги, вилоят ва Тошкент шаҳар адлия бошқармалари томонидан ҳуқуқий экспертизадан ўтказилиши ва унинг натижаси бўйича тегишли ҳуқуқий хулосалар берилишига алоҳида эътибор қаратишлари зарурлиги таъкидланди.

Семинарда иштирок этган халқ депутатлари маҳаллий кенгашлар котибиятлари, манфаатдор идоралар вакиллари ўзларининг қизиқтирган саволларига жавоб олди. Ер участкаларини компенсация эвазига жамоат эҳтиёжлари учун олиб қўйиш бўйича юзага келаётган муаммо ва камчиликларнинг олдини олиш юзасидан зарур таклиф ва тавсиялар берилди.

Н.Абдураимова, ЎзА