БМТ савдо чекловлари, жумладан, Қўшма Штатларнинг жорий қилаётган янги тарифлари жаҳон иқтисодиётига салбий таъсир кўрсатишидан хавотир билдирди.

– Бундай чоралар айниқса, ривожланаётган мамлакатларда молиявий муаммоларни янада кучайтириши мумкин, – деди ташкилотнинг расмий вакили Стефан Дюжаррик Нью-Йоркдаги брифингда.

БМТ матбуот котиби АҚШ янги маъмуриятининг Мексика, Канада ва Хитойдан импорт қилинадиган товарларга божлар жорий этиш ҳақидаги қарорига муносабат билдирар экан, жаҳон иқтисодиёти аллақачон паст ўсиш даврини бошдан кечираётгани ва савдо тўсиқларининг кучайиши заиф гуруҳларнинг аҳволини янада ёмонлаштиришини таъкидлади.

Унинг сўзларига кўра, савдо чекловлари кучайганига қарамай, аксарият давлатлар ҳали ҳам Жаҳон Савдо Ташкилоти (ЖСТ) қоидаларига амал қилмоқда, бу эса жаҳон иқтисодиётида барқарорлик ва ишончга ҳисса қўшади.

Аввалроқ, БМТнинг Иқтисодий ва ижтимоий масалалар бўйича департаменти вакили Григор Агабекян юқори тарифлар ва савдо чекловлари қўшимча қиймат занжирларини бузиши, ишлаб чиқариш фаолияти ва трансчегаравий инвестицияларга путур этказиши, импорт нархларининг ошишига ва ўсиш суръатларига таъсир қилиши мумкинлиги ҳақида огоҳлантирган эди.

С.Раҳимов, ЎзА