BMSh sawda sheklewleri, sonıń ishinde, Qurama Shtatlardıń engizip atırǵan jańa tarifleri dúnya ekonomikasına unamsız tásir kórsetiwinen qáweterde ekenin bildirdi.

– Bunday ilajlar ásirese, rawajlanıp atırǵan mámleketlerde qarjı mashqalaların jáne de kúsheytiwi múmkin,-dedi shólkemniń rásmiy wákili Stefan Dyujarrik Nyu-Yorktaǵı brifingte.
BMSh baspasóz xatkeri AQSh jańa hákimshiliginiń Meksika, Kanada hám Qıtaydan import etiletuǵın tovarlarǵa bajılar engiziw haqqındaǵı qararına múnásibet bildirip, dúnya ekonomikası álle qashan tómen ósiw dáwirin basınan ótkerip atırǵanı hám sawda tosqınlıqlarınıń kúsheyiwi ázzi toparlardıń jaǵdayın jáne de tómenletetuǵının atap ótti.
Onıń sózlerine bola, sawda sheklewleri kúsheygenine qaramastan, ayırım mámleketler ele de Jáhán Sawda Shólkemi (JSSh) qaǵıydalarına ámel etpekte, bul bolsa dúnya ekonomikasında turaqlılıq hám isenimge úles qosadı.
Aldın, BMShtıń Еkonomikalıq hám sociallıq máseleler boyınsha departamentiniń wákili Grigor Agabekyan joqarı tarifler hám sawda sheklewleri qosımsha baha shınjırların buzıwı, óndiris procesi hám transshegaralıq investiciyalarǵa zıyan jetkeriwi, import bahalarınıń artıwına hám ósiw pátlerine tásir etiwi múmkin ekenligi haqqında eskertken edi.

S.Rahimov, ÓzA