Бугун Жанубий Корея ҳукмрон партияси раҳбари Хан Дон Хун Президент Юн Сок Ёлни ҳарбий ҳолат жорий этишга урингани учун ҳокимиятдан четлатиш кераклигини айтди, лекин аъзоларни импичмент учун овоз беришдан қайтарди.
Сешанба куни етакчи “давлатга қарши кучлар”ни йўқ қилиш, сиёсий рақибларини енгиш учун ҳарбий ҳолат жорий қилиб, халқни ва ўзининг “Халқ кучлари” партияси жамоасини ҳайратда қолдирди.
Тахминан олти соат ўтиб у парламент, жумладан ўз партиясининг баъзи аъзолари мазкур фармонга қарши овоз бергач, таслим бўлишга қарор қилди.
Асосий мухолиф Демократик партия шанба оқшомига импичмент масаласини овоз қўйишни режалаштирган. Миллий полиция мухолифат ва фаоллар томонидан илгари сурилган қўзғолон даъвоси бўйича давлат раҳбарига нисбатан тергов бошлаган.
Бугун парламентда бўлиб ўтган партия йиғилишидан сўнг интервью берган Хан Дон Хун Президент ҳарбий ҳолат даврида “давлатга қарши кучлар” сафида бўлгани учун бир гуруҳ таниқли сиёсатчиларни ҳибсга олишга буйруқ берганини маълум қилди.
Кеча ҳукмрон партия импичментга қаршилигини билдирди, бироқ Хан “ишончли далиллар” асосида Сеул жанубидаги Квачхон шаҳрида сиёсий етакчилар ҳибсга олиниши мумкинлигини қайд этди.
– Кутилмаган тартибсизлик туфайли халқ ва тарафдорларга етказилган зарарни камайтириш учун импичментнинг олдини олиш ниятимни билдирдим, – деди Хан. – Шундай бўлса-да, юзага чиққан янги маълумотлар Президент Юн Сок Ёлнинг ваколати зудлик билан тўхтатилиши Корея Республикаси ва халқимизни ҳимоя қилиш учун жуда зарурлигини кўрсатяпти.
Импичмент мавзуси оддий қонунчилар иштирокидаги кенгайтирилган йиғилишда ҳам кўриб чиқилди. Таклифни қўллаб-қувватловчи партия юқори мартабали депутати Чо Кёунг-Те журналистларга ҳар бир партия аъзоси энди “халқ ёнини оладими ё ҳарбий ҳолат тарафдорлари билан ҳамкорлик қиладими” ўзи қарор қилиши лозимлигини айтди. Кўпчилик 2016 йил Президент Пак Кин Хега нисбатан импичмент қўлланган ҳолат яна такрорланишини истамаслигини билдирди. Зеро, ўша воқеалар таъсирида консерватив партия тарқалиб кетиб, президент ва умумий сайловда либераллар ғалаба қозонган эди.
Ҳукмрон партиядан беш марта депутатликка сайланган Юн Сан Хён импичментга қарши чиқди ва Хан партиянинг юқори мартабали вакиллари билан етарли даражада маслаҳатлашмаганидан шикоят қилди:
– Биз Президентга импичмент эълон қилиб, режимни Ли Джэмённинг Демократик партиясига ишониб топшира олмаймиз. Бу қарор Юн Сок Ёлни ҳимоя қилиш эмас, балки Корея Республикаси тизими ва фарзандларимиз келажаги учун зарур. Шахсан мен эртага импичмент жараёнида қатнаша олмайман.
Демократ Ан Гви-Рён фикрича, одамлар аллақачон Юнга руҳан импичмент эълон қилган.
Аннинг сешанба куни парламент олдида аскар билан баҳслашиб, қурол ушлаб тушган тасвири мамлакатнинг ҳарбий ҳолатга қаршилиги рамзи сифатида ижтимоий тармоқ орқали тарқалди.
– Ўйин ўйнаётган боладек ҳарбий ҳолат эълон қилган раҳбарга ишониш мумкинми, деган Гви-Рён. – Ким халқни бундай раҳбарга ишониб топширарди?
Бир неча соат олдин эълон қилинган “Галлуп Кореа” сўрови натижаси Президентни қўллаб-қувватлаш рейтинги 13 фоизга тушиб кетганини кўрсатган.
Мусулмон Зиё, ЎзА