Búgin Qubla Koreya húkimran partiyası basshısı Xan Don Xun Prezident Yun Sok Yoldı áskeriy jaǵday engiziwge urınǵanı ushın hákimiyattan shetletiw kerek ekenin ayttı, biraq impichment ushın dawıs beriwden qaytardı.
Shiyshembi kúni jetekshi «mámleketke qarsı kúshler»di joq etiw, siyasiy qarsılaslardı jeńiw ushın áskeriy jaǵday járiyalap, xalqtı hám óziniń «Xalıq kúshleri» partiyası toparın tań qaldırdı.
Shama menen altı saat ótip ol parlament, sonıń ishinde, óz partiyasınıń ayırım aǵzaları bul pármanǵa qarsı dawıs bergennen soń, boysınıwǵa qarar etti.
Tiykarǵı qarsılas Demokratiyalıq partiya shembi aqshamına impichment máselesin dawısqa qoyıwdı rejelestirgen. Milliy policiya oppoziciya hám belsendiler tárepinen alǵa qoyılǵan qozǵalań dawası boyınsha mámleket basshısına tergew baslaǵan.
Búgin parlamentte bolıp ótken partiya májilisinen soń intervyu bergen Xan Don Xun Prezident áskeriy jaǵday dáwirinde «mámleketke qarsı kúshler» qatarında bolǵanı ushın bir topar belgili siyasatshılardı qamaqqa alıwǵa buyrıq bergenin málim etti.
Keshe húkimran partiya impichmentke qarsılıǵın bildirdi, biraq Xan «isenimli dáliller» tiykarında Seuldiń qublasındaǵı Kvachxon qalasında siyasiy jetekshiler qamaqqa alınıwı múmkin ekenin atap ótti.
– Kútilmegen tártipsizlik sebepli xalıq hám tárepdarlarǵa jetkerilgen zıyandı azaytıw ushın impichmenttiń aldın alıw niyetimdi bildirdim, – dedi Xan. – Solay bolsa-da, payda bolǵan jańa maǵlıwmatlar Prezident Yun Souk Yoldıń wákilligi tezlik penen toqtatılıwı Koreya Respublikası hám xalqımızdı qorǵaw ushın oǵada zárúrligin kórsetip atır.
Impichment teması ápiwayı nızamshılar qatnasıwındaǵı keńeytilgen májiliste de kórip shıǵıldı. Usınıstı qollap-quwatlawshı partiyanıń joqarı mártebeli deputatı Cho Kyoung-Te jurnalistlerge hár bir partiya aǵzası endi «xalıq tárepimdi ala ma yaki áskeriy jaǵday tárepdarları menen birge islese me» ózi qarar etiw kerek ekenin ayttı. Kópshilik 2016-jılı Prezident Pak Kin Xege impichment qollanǵan jaǵday jáne tákirarlanıwın qálemeytuǵının bildirdi. Sol waqıyalar tásirinde konservativlik partiya tarqalıp ketip, prezident hám ulıwma saylawda liberallar jeńiske erisken edi.
Húkimran partiya bes márte deputatlıqqa saylanǵan Yun San Xyon impichmentke qarsı shıqtı hám Xan partiyanıń joqarı mártebeli wákilleri menen jeterli dárejele másláhátlespegeninen shaǵım etti:
– Biz Prezidentke impichment járiyalap, rejimdi Li Djemyonniń Demokratiyalıq partiyasına isenip tapsıra almaymız. Bul qarar Yun Sok Yoldı qorǵaw emes, al Koreya Respublikası sisteması hám perzentlerimizdiń keleshegi ushın zárúr. Jeke men erteń impichment procesinde qatnasa almayman. Demokrat An Gvi-Ryonnıń pikirinshe, adamlar álleqashan Yunǵa ruwxıy impichment járiyalaǵan.
Annıń shiyshembi kúni parlament aldında ásker menen básekilesip, qural uslap túsken kórinisi mámlekettiń áskeriy jaǵdayǵa qarsı ekeni belgisi sıpatında sociallıq tarmaq arqalı tarqaldı.
– Oyın oynap atırǵan baladay áskeriy jaǵday járiyalaǵan basshıǵa iseniw múmkin be, degen Gvi-Ryon. – Kim xalıqtı bunday basshıǵa isenip tapsırar edi? Bir neshe saat aldın járiyalanǵan «Gallup Korea» sorawı nátiyjesi Prezidentti qollap-quwatlaw reytingi 13 procentke túsip ketkenin kórsetken.

Musulmon Ziyo, ÓzA