Хитой делегацияси – Самарқандда
Хитой Инсон ҳуқуқларини ўрганиш жамияти доимий қўмитаси раиси ўринбосари Цзян Цзяньго бошчилигидаги делегация бугун Самарқанд шаҳрида бўлди.
Меҳмонлар Амир Темур мақбараси, Регистон мажмуаси ва бошқа тарихий-маданий ёдгорликлар, диққатга сазовор жойлар билан яқиндан танишди. Хитой делегациясига мазкур обидаларнинг яратилиш тарихи ва аждодларимизнинг бунёдкорлик салоҳияти ҳамда юртимизда ушбу меросни асраб-авайлаш борасида олиб борилаётган ишлар ҳақида батафсил маълумот берилди.
Цзян Цзяньго Самарқанд қадимий буюк ипак йўлининг чорраҳасида жойлашган шаҳар сифатида минтақада савдо-иқтисодий муносабатлар, илм-фан ва маданият ривожига катта ҳисса қўшганини эътироф этди.
Хитой Инсон ҳуқуқларини ўрганиш жамияти доимий қўмитаси раиси ўринбосари Цзян Цзяньго ҳамда делегация вакиллари куни кеча Инсон ҳуқуқлари бўйича Ўзбекистон Республикаси Миллий марказида ўтказилган “Инсон ҳуқуқлари соҳасидаги глобал трендлар ва минтақавий хусусиятлар: Ўзбекистон – Хитой назарияси” мавзусида давра суҳбатида қатнашган эди.
Анжуман инсон ҳуқуқи соҳасидаги ҳамкорликни мустаҳкамлаш ва ҳар томонлама тажриба алмашиш, соҳага оид долзарб глобал тенденциялар ва минтақавий хусусиятларни муҳокама қилиш, ҳар икки мамлакатда инсон ҳуқуқи билан боғлиқ ҳолатни яхшилашга қаратилган қўшма стратегия ва ташаббуслар ишлаб чиқиш мақсадида ташкил этилган эди.
Ғ.ҲАСАНОВ,
А.ИСРОИЛОВ (сурат), ЎзА мухбирлари