Хитой Америка халқига умид боғлайди, америкаликлар билан дўст бўлишда давом этади, ХХР ва АҚШ ўртасидаги муносабатлар инсон омилига асосланган.
“Синьхуа” агентлиги ёзишича, Хитой Раиси Си Цзиньпин америкалик таниқли тадбиркор, жамоат арбоби Билл Гейтс билан учрашув чоғида шундай фикрларни билдирган.
“Сиз бу йил Пекинда мен билан учрашган биринчи америкалик дўст бўлдингиз”, дея қўшимча қилди Хитой раҳбари.
Си Цзиньпин дунё коронавирус пандемиясидан қутулганини таъкидларкан, яна шундай деди:
– Мен кўп марта айтганман, Хитой – Америка муносабатининг асосини шу икки мамлакат одамлари ташкил этади. Биз доимо АҚШ халқига умид боғлаймиз ва икки халқ дўстлиги давом этишидан умидвормиз.
Хитой етакчиси Гейтс ва унинг жамғармасига глобал қашшоқликни камайтириш, соғлиқни сақлаш, тараққиёт, жамоат фаровонлиги ва хайрия ишларини илгари суриш бўйича кўп йиллик саъй-ҳаракатлари учун миннатдорлик билдирди.
– Қашшоқликка қарши курашда эришилган ютуқларни мустаҳкамлашимиз, қишлоқларни жонлантириш, чекка ҳудудларда тиббий хизмат кўрсатиш даражасини мунтазам оширишимиз зарур, – деди Си Цзиньпин.