Кеча ўз ишини бошлаган жаҳон тўқимачилик саноатининг энг йирик тадбирларидан бири – «Heimtextil – 2023» кўргазмасида мамлакатимизнинг Франкфурт-Майн ва Берлиндаги дипломатия ваколатхоналари ҳамда «Ўзтўқимачиликсаноат» кўмагида ташкил этилган Ўзбекистон миллий стенди намойиш этилмоқда.
Маълумот ўрнида айтиш керак, Германиянинг иқтисодий пойтахтларидан бири – Франкфурт-Майн шаҳрида ҳар йили ўтказиладиган ушбу анъанавий кўргазмада 3 мингдан ортиқ экспонентлар намойиш этилади. Дунёдан 60 минг нафар профессионал меҳмонлар ушбу халқаро тадбир иши билан танишади.
Ушбу нуфузли тадбирда халқаро сертификатларга эга 15 та маҳаллий корхона вакилларидан иборат Ўзбекистон делегацияси «Made in Uzbekistan» бренди остида иштирок этмоқда.
Тадбир давомида унинг иштирокчилари Ўзбекистон тўқимачилик саноатининг жорий салоҳияти ва истиқболдаги режаларига оид тақдимот материаллари билан танишиши мумкин. Шу билан бирга, маҳаллий тўқимачилик маҳсулотларини Германияга экспорт қилиш соҳасида ўзаро манфаатли шартномалар тузиш имконига эга бўлади. Хорижлик иштирокчилар ўзбек трикотаж маҳсулотларининг нарх-сифат нисбати қулайлигини катта қизиқиш билан қайд этиб, узоқ муддатли ҳамкорликка интилишларини билдирди.
Хитой халқаро инвестиция компаниясининг савдо агенти Михаэль Борхманнинг сўзларига кўра: ”Ўзбекистон ҳар йили жаҳон тўқимачилик саноатида алоҳида ўрин эгаллаган ўзбек тўқимачилик маҳсулотларининг сифати ва нафислигини намойиш этмоқда. Бундан ташқари, Ўзбекистон қизиқарли тарихий ва маданий ўтмишга эга мамлакат. Бу мамлакатда икки марта бўлганман ва у менинг қалбимда алоҳида ўрин тутади”.
Маълумот ўрнида айтиш керак, 2022 йилнинг 10 ойи давомида ўзбек тўқимачилик маҳсулотлари экспортида йиллик ўсиш 10,7 фоизни ташкил этиб, 2,6 миллиард АҚШ долларидан ошди. 2025 йилга бориб тўқимачилик маҳсулотлари экспорти 7 миллиард долларгача ўсиши кутилмоқда.
Бунда республикамизда тадбиркорлик фаолиятининг ҳуқуқий асослари яратилаётгани, раҳбариятнинг мамлакатимиз иқтисодиётини янада ривожлантиришга, янги инвесторларни жалб этишга интилиши ўзининг салмоқли натижасини бермоқда.
ЎзА