Хабар берганимиздек, Марказий банк бошқарув йиғилишида «Туркистон» хусусий акциядорлик тижорат банки ва “HI-TECH BANK” хусусий акциядорлик тижорат банкларининг банк фаолиятини юритиш ҳуқуқини берувчи лицензияларни бекор қилиш тўғрисида қарор қабул қилинди.
Ушбу молия муассасаларининг минглаб мижозлари бор. Табиий савол туғилади: бу банкка омонатларини чет эл валютасида қўйган омонатчиларнинг омонатлари чет эл валютасида қайтариладими?
– Бу банкларга қўйган омонатларимиз нима бўлади, деган хавотирлар бўлмоқда. Бундай хавотирларга ўрин йўқ. Мамлакатимизда Фуқаролар банклардаги омонатларини кафолатлаш фонди фаолият юритади. Қонунга асосан фуқароларнинг банкдаги омонатлари 100 фоиз ушбу фонд томонидан кафолатланади. Бугунги кунда 2 триллиондан ортиқ маблағларимиз мавжуд. Омонатчиларнинг пулларини тўлиқ кафолатлаб беришга қурбимиз етади. Бу жараён қонунчиликка асосан 2 ой ичида тугатилаётган банкнинг тугатиш комиссияси банкнинг барча маблағларини жамлайди. Кредиторларини, дебиторларининг барчасини аниқлайди. Бундан кейин биринчи навбатда қонунчиликка асосан фуқароларнинг омонатларини қоплаш учун бу маблағ йўналтирилади. Мабодо ўша тугатилган банкнинг маблағи етмай қолган тақдирда, фуқаролар банклардаги омонатларини кафолатлаш фонди 2 ойдан кейин, керакли ҳужжатларни олгандан кейин Агентбанк орқали, яъни соғломбанк Марказий банк билан келишилган ҳолда белгиланади ва шу орқали тўланади. Чет эл валютасида қўйилган омонатлар Марказий банкнинг бугунги кун курси билан миллий валютада, яъни сўмда қайтарилади.
Эслатиб ўтамиз, бугунги кунда «Туркистон» хусусий акциядорлик тижорат банкида аҳолининг 339 миллиард сўм «HI-TECH BANK» хусусий акциядорлик тижорат банкида эса 5 миллиард сўмлик омонатлари бор. Юқоридаги икки банк омонатчилари ўзларини хотиржам ҳис қилишлари мумкин, – дейди Фуқаролар банклардаги омонатларини кафолатлаш фонди директори Нодир Аббосов.
Шаҳноза Маматуропова, ЎзА