Prezident Shavkat Mirziyoev Sırdárya wálayatına saparı dawamında Gúlistan qalası Bostan máhállesinde ámelge asırılǵan dóretiwshilik jumısların barıp kórdi.

Ózbekstan Respublikası Prezidentiniń “2023-2025-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında”ǵı qararınıń orınlanıwı sheńberinde máhállede bir qatar jumıslar islendi.
Aymaqtaǵı 48 kóp qabatlı jay aǵımdaǵı ońlandı, sırtqı tárepi bazalt penen qaplandı. Íssılıq támiynatın jaqsılaw maqsetinde 18 milliard sum esabınan zamanagóy qazanxana hám 3,3 kilometr ıssılıq tarmaqları qurıldı.
Kóp qabatlı turaq jaylarda 23 jeke ıssılıq punktleri ornatılıp, “jabıq” sistema shólkemlestirildi. Jergilikli byudjet qarjıları esabınan aymaqtaǵı 800 kvartiralı 20 kóp qabatlı turaq jaydıń ishki ıssılıq sistemaları qayta tiklendi. 1 baqsha oraylasqan ıssılıq energiyası hám ıssı suw menen támiyinlendi.
Jańa qazanxananıń qurılısı nátiyjesinde 144 mıń kilovatt-saat elektr hám 627 mıń kub metr tábiyǵıy gaz únemlenedi.
Prezidentimiz kóp qabatlı turaq jaylarda jasaytuǵın xalıq ushın qolaylı sharayat jaratıwǵa qaratılǵan bul jumıslardı dawam ettiriw, qazanxanalardı qurıw hám olardan paydalanıwda zamanagóy texnologiyalardı qollanıw, maman qánigelerdi tartıw boyınsha zárúr kórsetpeler berdi.
Usı jerdiń ózinde “jetilik” wákilleri hám nuranıylar menen máhálle hám wálayat turmısında bolıp atırǵan ózgerisler haqqında sáwbet boldı.
Ózbekstan Respublikası Prezidentiniń Sırdárya wálayatında infrastrukturanı rawajlandırıwǵa baylanıslı qararı tiykarında aymaqta 215 kóp qabatlı jaydı qamtıp alǵan arnawlı mánzilli dizim qáliplestirilgen. Bul baǵdarlama sheńberinde turaq jaylardıń tóbe hám fasad bólimlerin ońlaw, ıssılıq támiynatın jaqsılaw, injenerlik kommunikaciya tarmaqların jaqsılaw hám qorshaǵan ortalıqtı abadanlastırıw jumısları rejelestirilgen.

ÓzA