Qaraqalpaqstan Respublikasında sońǵı jıllarda tarawlardı rawajlandırıw, investiciyalıq joybarlardı nátiyjeli iske qosıw, kishi biznesti rawajlandırıw, xalıqtıń turmısın jaqsılaw baǵdarında bir qatar ilajlar ámelge asırılmaqta.

Ózbekstan Respublikası Oliy Majlisi Senatı Baslıǵı T.Norboeva usı baǵdardaǵı jumıslardıń barısı, xalıqtı qıynap kiyatırǵan mashqalalar menen tanısıw maqsetinde respublikamızǵa xızmet saparı menen keldi.

Sapardıń dáslepki ilajları Tórtkúl rayonınan baslandı.

Ózbekstan Respublikası Oliy Majlisi Senatı Baslıǵı T.Narbaevanıń Qaraqalpaqstan Respublikasına saparı sheńberinde Tórtkúl rayonındaǵı Mádeniyat sarayında korrupciyaǵa qarsı gúresiw hám onıń aldın alıw máseleleri boyınsha májilis ótkerildi.

Onda Qaraqalpaqstan Respublikası Joqarǵı Keńesiniń Baslıǵı A.Orınbaev, sonday-aq, barlıq rayon, qala studiyalarınan video baylanıs arqalı taraw basshıları, juwapkerler, huqıq qorǵaw uyımlarınıń basshıları qatnastı.

Májiliste T.Narbaeva shıǵıp sóylep, Korrupciyaǵa qarsı gúresiw milliy Keńesi hám onıń aymaqlardaǵı bólimleri, Parlament palatalarında qánigelestirilgen komitetler tárepinen alıp barılıp atırǵan jumıslarǵa toqtap ótti.

Korrupciyaǵa qarsı gúresiw Milliy Keńesi aǵzalarınan dúzilgen jumısshı topar respublikamızda bolıp tarawlardaǵı korrupciyalıq jaǵdaylardıń barısın úyrengeninde bir qatar kemshiliklerdiń anıqlanǵanın sın kózqarasta talqılap ótti.

Májiliste búgingi kúnde orınlarda korrupciyaǵa qarsı gúresiw, korrupciyalıq jaǵdaylardıń hám jınayatshılıqtıń aldın alıw boyınsha ámelge asırılıp atırǵan jumıslar, bul baǵdarda jol qoyılǵan qáte-kemshilikler, bilimlendiriw, medicina hám basqa da tarawlarda júz berip atırǵan jınayatlar, profilaktikalıq ilajlardıń nátiyjeli alıp barılmay atırǵanı sıyaqlı áhmiyetli máseleler sınǵa alınıp, pikir-usınıslar bildirildi.

Respublika arnawlı jumısshı toparı tárepinen anıqlanǵan kemshilikler atap ótilip, shıǵıp sóylewshiler tárepinen mashqalalarǵa keń túrde toqtalıp, jınayatshılıqtıń aldın alıw hám boldırmaw boyınsha máhálleniń ózinde sistemalı túrde jumıs alıp barılıwı kerek ekenligi ayrıqsha atap ótildi. Májiliste sonday-aq, óz wazıypasın orınlawda kemshiliklerge jol qoyǵan ayırım basshılardıń lawazımına ılayıqlıǵı máselesin úyrenip shıǵıw boyınsha tapsırmalar berilip, aldaǵı wazıypalar belgilep alındı.

Soń Senat Baslıǵı Tórtkúl rayonındaǵı máhálle belsendileri menen ushırastı. Usı maqsette Oliy Majlis Senatı Baslıǵı T.Narbaeva Joqarǵı Keńes Baslıǵı A.Orınbaev hám Ministrler Keńesiniń Baslıǵı F.Ermanov penen birge Tórtkúl rayonındaǵı «Beruniy» máhállesine bardı.

Bul jerde huqıqbuzarlıqlardıń erte aldın alıw hám «sociallıq profilaktika» sistemasınıń shólkemlestirilgenligi, huqıqbuzarlıqlardıń erte aldı alınıwın támiyinlew boyınsha islep shıǵılǵan mánzilli ilajlar «jol kartaları»nıń orınlanıwı, sonday-aq, awır hám oǵada awır jáne shańaraq-turmıs sheńberindegi jınayatlardıń júz beriwine sebep bolıp atırǵan faktorlar hám juwapker uyımlar tárepinen olardı saplastırıw boyınsha kórilip atırǵan ilajlar kózden ótkerildi.

Belsendiler menen jaqınnan pikirlesip, máhálleni qızıl kategoriyadan shıǵarıw, puqaralardıń turmıs abadanlıǵın arttırıw baǵdarında pikir-usınıslar tıńlandı.

Oliy Majlis Senatınıń Baslıǵı Beruniy rayonına da barıp, bul rayondaǵı xalıqtıń bántligin támiyinlew boyınsha jumıslar menen tanıstı. Oliy Majlis Senatı Baslıǵı T.Narbaeva Joqarǵı Keńes Baslıǵı A.Orınbaev hám Ministrler Keńesiniń Baslıǵı F.Ermanov penen birge rayondaǵı «Birlik» máhállesinde jasawshı baba diyqan, úlgili qıytaq jer iyesi Yu.Narimbetovtıń shańaraǵında miymanda boldı.

Ázelden tájiriybeli diyqanlar eli bolǵan Beruniy rayonı miynetkeshleri ele qıs juwmaqlanıp úlgermesten qıytaq jerlerinde bıyılǵı máwsim ushın tayarlıqlardı baslap jibergen. Yu.Narimbetov úy aldı qıytaq jerinen jılına úsh márte ónim alıwdı jolǵa qoyǵan usınday insanlardıń biri. Ol 31 sotix jerindegi ıssıxanalarında ovoщ, palız eginleriniń nállerin jetistirip, respublikamızdıń barlıq rayonlarına, sonday-aq, Buxara, Xorezm wálayatlarına da jetkerip beriwdi jolǵa qoyǵan. Kútilip atırǵan nátiyjeler de miynetke jarasa – bıyıl qıytaq jerden 500 mln. sum dáramat alıwdı rejelestirgen. Máwsimlik 10 jumısshınıń da bántligi támiyinlengen.

Senat Baslıǵı diyqan menen jaqınnan pikirlesip, onıń napaqada bolıwına qaramastan ele miynetsúygishlik penen qıytaq jerinde jumıslardı nátiyjeli shólkemlestirgeni kópshilikke úlgi bolıwı kerekligin atap ótti.

Bunnan soń Senat Baslıǵı «Toqımashı» máhállesindegi «RAYHON APPAREL» juwapkershiligi sheklengen jámiyetiniń jumısları menen jaqınnan tanıstı.

Ulıwma joybar quwatlılıǵı 28,5 mlrd. sum bolǵan kárxanada jılına 5 mln. dana 15 túrdegi trikotaj kiyim-kenshekler tigiledi. Ónimler tiykarınan eksportqa baǵdarlanıp, házirgi waqıtta 500 jańa jumıs orınları jaratılǵan.

Oliy Majlis Senatınıń Baslıǵı T.Narbaeva kárxana jumısshıları, sonday-aq, bul jerde tájiriybe arttırıp atırǵan qızlar menen jaqınnan pikirlesti.

Senat Baslıǵı Nókis qalasında jaslar menen ushırasıp, bunnan soń súmelek seyilinde qatnastı.

Oliy Majlis Senatı Baslıǵı Ózbekstan velosiped sportı federaciyası baslıǵı T.Narbaeva Qaraqalpaqstanlı jas velosportshılar menen ushırastı.

Jaslar menen ushırasıwda búgingi kúnde Prezidentimiz tárepinen barlıq tarawlar qatarında sporttı rawajlandırıw, elimiz bayraǵın dúnyaǵa tanıtatuǵın sportshılardı jetilistirip shıǵarıw, olardı hár tárepleme qollap-quwatlawǵa qaratılıp atırǵan itibar ayrıqsha atap ótildi.

Sonday-aq, ushırasıwda Ózbekstan velosiped sportı federaciyası Qaraqalpaqstan bólimine Prezident sawǵası – arnawlı avtotransport, bir topar jaslarǵa sport velosipedleri tapsırıldı.

Qaraqalpaqstanǵa saparı dawamında Senat Baslıǵı T.Narbaeva Joqarǵı Keńes Baslıǵı A.Orınbaev hám Ministrler Keńesiniń Baslıǵı F.Ermanov penen birgelikte Nókis qalasındaǵı Boz awıl mákan puqaralar jıyınında jaylasqan máhálle servis kompaniyasınıń jumısları menen de tanıstı. Úy sharayatında dáramat tabıw baǵdarında shólkemlestirilgen jumıslar kózden ótkerilip, máhálle belsendileri menen xalıq penen birge islesiw boyınsha ámelge asırılıp atırǵan jumıslar haqqında sáwbetlesti.

Senat Baslıǵı bunnan soń aymaq turǵınları menen jaqınnan pikirlesip, elimizde keń túrde belgilenip atırǵan, keńpeyillik hám jaqsılıq tımsalı bolǵan Nawrız bayramı sheńberinde súmelek seyilinde qatnastı hám óziniń jaqsı tileklerin bildirdi.

Sapar sheńberinde korrupciyalıq jaǵdaylardıń aldın alıw hám hayal-qızlardı qollap-quwatlaw máseleleri de keń túrde talqılandı. Oliy Majlis Senatı Baslıǵı T.Narbaeva Ministrler Keńesinde shólkemlestirilgen Sociallıq-siyasiy jaǵday shtabınıń jumısları, sonday-aq, korrupciyanıń aldın alıw baǵdarında sanlastırıw jumıslarınıń alıp barılıwı menen tanıstı.

Atap ótiw orınlı, arnawlı shtab tárepinen búgingi kúnde xalqımızdıń tikkeley kewil-keypiyatına keri tásirin tiygizip atırǵan máseleler, ushırasıp atırǵan túrli mashqalalar turaqlı túrde úyrenilip barılıwı jolǵa qoyılǵan bolıp, bul mashqalalar qadaǵalawǵa alınbaqta hám sheshimin tabıw boyınsha tiyisli ilajlar óz waqtında kórilmekte.

Sonıń menen birge, bilimlendiriw, bazar xızmetlerin usınıw sıyaqlı ayırım tarawlarda ushırasıp atırǵan korrupciyalıq jaǵdaylardıń aldın alıw maqsetinde sanlastırıw jumıslarınıń jedellestiriliwi, bul boyınsha zárúr ilajlardıń alıp barılıwı, sonday-aq, korrupciyanıń aldın alıw boyınsha Aymaqlıq keńes tárepinen arnawlı islep shıǵılǵan jańa patforma, nızam hújjetleri menen baylanıslı arnawlı usınıslar prezentaciyası tanıstırıldı.

Bunnan soń, hayal-qızlardı sociallıq-ekonomikalıq qollap-quwatlaw boyınsha belgilep alınǵan tiykarǵı wazıypalardı ámelge asırıw máseleleri belsendi hayal-qızlar hám juwapkerlerdiń qatnasıwında keń túrde dodalandı.

Ótkerilgen ilaj dawamında jıllar dawamında hújjetleri joqlıǵı sebepli turmıslıq qıyınshılıqlarǵa dus kelip júrgen respublikamız aymaǵında turaqlı jasap kelgen 31 puqaraǵa Prezidentimizdiń pármanı menen puqaralıǵın tastıyıqlawshı hújjetleri tapsırıldı.

 

Qaraqalpaqstan xabar agentligi.