Saudiya Arabstanınıń «An-Nahor» (annahar.com) basılımında Ózbekstan Milliy málimleme agentligi Xalıqaralıq málimleme redakciyası jetekshi redaktorı Muharrama Pirmatovanıń «Taqıya – ózbek milliy mádeniyatınıń ajıralmas bólegi» atamasındaǵı maqalası járiyalandı.

Avtor dáslep milliy kiyim-kensheklerimiz hám kiyiniw mádeniyatımız aynası bolǵan ózbektiń tiykarǵı bas kiyimi – taqıyanı tigiw hám bezew xalıq ámeliy kórkem óneriniń keń tarqalǵan túri ekenine itibar bergen.
– Burın bas kiyim erkekler hám hayal-qızlar ushın birdey áhmiyetke iye bolǵan, bezegi bolsa taqıya iyesiniń jámiyettegi sociallıq jaǵdayın bildirgen,-dep jazadı basılım. – Bul bas kiyim ázelden parsı hám túrkiy xalıqlar arasında keńnen tarqalǵan. Basqa xalıqlardikinen ózine tán shaqlı hám naǵısına bola ózgeshelenetuǵın ózbek taqıyaları, tiykarınan shayıdan jıltır jip penen tigiledi. Úsh bólim – aylanba yamasa tórt múyesh joqarı bólegi, qızaq-gárdish hám jiyekten ibarat. Respublika aymaqlarında hár qıylı forma, bezew modaǵa kirgen.
Maqalada taqıyanı kóbirek hayal-qızlar tigetuǵını, ayırım er adamlar da usı jumıs penen shuǵıllanatuǵını, ónermentlerimiz milliy bas kiyimimizdi bezewde kórkem belgilerdiń úylesimligin támiyinlewge de ayrıqsha itibar qaratatuǵını atap ótilgen.
Ulıwma, sırt el basılımları arqalı ózbek mádeniyatı hám milliyligimizdi dúnya boylap úgit-násiyatlawǵa qaratılǵan bunday materiallar, basqa tárepten, oqıwshılarǵa mámleketimiz ónermentleri imkaniyatı haqqında da belgili maǵlıwmatlar beredi hám tikkeley turizm tarawınıń rawajlanıwına da xızmet etedi.

ÓzA