Ózbekstan Respublikası Qurallı Kúshleri dúzilgeniniń 33 jıllıǵı hám 14-yanvar – Watan qorǵawshıları kúni múnásibeti menen ótkerilip atırǵan bayram ilajları orınlarda kóterińkilik ruwxında dawam etpekte.
Qanlıkól rayonındaǵı Mektepke shekemgi hám mektep bilimlendiriwi bólimine qaraslı 5-sanlı ulıwma orta bilim beriw mektebinde de «Watandı mártler qorǵaydı» atamasında bayram keshesi shólkemlestirildi.
Keshede oqıwshılar tárepinen tayarlanǵan áskeriy shınıǵıwlardan kórinisler, qosıq hám ayaq oyınlar atqarıldı.
Bayram múnásibeti menen jıl dawamında jetiskenliklerge erisken bir qatar muǵallimler hám oqıwshılar mektep adminstraciyası tárepinen “Húrmet jarlıq”ları menen sıylıqlandı.
Sonday-aq, jaslardı Watanımızdı qádirlew, onıń ǵárezsizligin qorǵaw jolında sadıq xızmet etiwshi insan etip tárbiyalawda ata-analardıń ornı ayrıqsha.
Búgingi kúnde Qanlıkól rayonınan 54 jas ózleriniń Watan aldındaǵı perzentlik wazıypasın orınlaw ushın áskeriy xızmetti ótemekte.
Bayram múnásibeti menen áskeriy xızmetin ótep atırǵan bir qatar belsendi jaslardıń ata-analarınan xabar alınıp, bayram menen qutlıqlap, perzentlerin xalqımız ushın biybaha baylıq bolǵan mámleketimizdiń ǵárezsizligi hám tınıshlıǵın qorǵaw ruwxında tárbiyalaǵanı ushın olarǵa minnetdarshılıq bildirildi.

Qaraqalpaqstan xabar agentligi.