Ózbekstan Respublikası Ministrler Kabineti «Germaniya Federativlik Respublikası Húkimeti menen qarjılay birge islesiwde Ózbekstanda kásiplik bilimlendiriwdi qollap-quwatlaw baǵdarlamaların ámelge asırıw ilajları haqqında» qarar qabılladı.

Oǵan muwapıq, Germaniya Federativlik Respublikası «KfW» bankiniń grantı tiykarında 7 kásiplik kónlikpeler orayların qurıw-montajlaw, ońlaw hám úskenelew jumısları ámelge asırıladı.
Qarar menen «Ózbekstanda kásip-óner bilimlendiriwin qollap-quwatlaw» joybarınıń texnikalıq-ekonomikalıq toplam parametrleri tastıyıqlandı.
Kámbaǵallıqtı qısqartıw hám bántlik ministrligi usı joybarǵa ajıratılatuǵın granttan maqsetli paydalanıw hám onı nátiyjeli ámelge asırıwǵa juwapker orınlawshı bolıp esaplanadı.
Joybarǵa kirgizilgen obyektlerde qurılıs-montajlaw jumısların qarjılandırıw, sonday-aq, ásbap-úskeneler menen támiyinlew qárejetleri Germaniya Federtivlik Respublikası «KfW» bankiniń grantları esabınan ámelge asırıladı.
Bul miynet bazarınıń nátiyjeli mexanizmlerin engiziw, kámbaǵal hám jumıssız puqaralardı zamanagóy kásip-ónerge oqıtıwdı shólkemlestiriw, sonday-aq, Germaniya Federativlik Respublikası Húkimeti menen qarjılay birge islesiwdi jáne de keńeytiw, kásip-ónerge oqıtıw orayların ońlaw, úskenelew hám olardan nátiyjeli paydalanıwdı támiyinlew imkaniyatın beredi.
Maǵlıwmat ushın:
Ózbekstan Respublikası Húkimeti hám Germaniya Federativlik Respublikasınıń «Kreditanstalt fiir Wiederaufbau» banki arasında 2023-jıl 8-noyabrde qol qoyılǵan «Ózbekstanda kásip-óner bilimlendiriwin qollap-quwatlaw» grant kelisiminde 5 jıl múddette 16 mln evro muǵdarında grant ajıratılıwı belgilengen edi.

ÓzA