Oliy Majlis Nızamshılıq palatasındaǵı siyasiy partiyalar frakciyalarınıń májilisleri bolıp ótti. Olarda dáslep sońǵı kúnlerde mámleketimiz turmısındaǵı áhmiyetli waqıyalarǵa toqtap ótti hám frakciyalar aldında turǵan wazıypalar belgilep alındı. Sonday-aq, májilislerde bir qatar nızam joybarları qızǵın dodalandı.
Sonıń ishinde, «Milliy tiklanish» demokratiyalıq partiyası frakciyasınıń májilisinde «Ózbekstan Respublikasınıń Miynet kodeksine ózgeris hám qosımshalar kirgiziw haqqında»ǵı nızam joybarı qızǵın dodalawlarǵa sebep boldı. Onda miynet processindegi zorlıqlardıń aldın alıw, bunnan jábirlengen shaxslardı sociallıq hám huqıqıy qorǵaw máseleleri názerde tutılǵan.
Joybarda sonday-aq, zorlıqtan jábirlenip, qorǵaw orderinen paydalanǵan xızmetkerge jıl dawamında 10 kalendar kúnnen ibarat haq tólenetuǵın dem alıs beriw názerde tutuılmaqta. Jáne bir áhmiyetli jańalıq: perzent tuwılǵanda er adamlarǵa da 5 kúnlik haqı tólenetuǵın dem alıs beriw usınıs etilmekte.
Xalıq demokratiyalıq partiyası frakciyasınıń májilisinde Jınayat atqarıw kodeksine kirgizilip atırǵan ózgeris hám qosımshalar keńnen dodalandı.
-Bul joybarda jazanı ótew mákemelerindegi jaza ótewshilerdiń óz jaqınları, shańaraq aǵzaları menen videoushırasıwların shólkemlestiriw máselesi názerde tutılmaqta,- deydi XDP frakciyası aǵzası Sayyora Imomova. _Jazanı ótewshiler videoushırasıwlar dawamında shańaraǵın, perzentlerin kórip, sóylesiwi olarda insanlarǵa, dástúrlerge unamlı ózgerislerdi payda etiwi múmkin. Sonday-aq, videoushırasıw qárejeti jaza ótewshiniń jazanı ótew dawamında ózi islep tapqan miynet haqısınan qaplanıwı onıń shaqaraq byudjetine tásir etpeytuǵınına xızmet etedi.
Májilislerde kórip shıǵılǵan barlıq máseleler boyınsha usınıslar bildirilip, tiyisli qararlar qabıl etildi.
ÓzA