2026-jıldıń paxta ónimi ushın egiske tayarlıq jumısları sheńberinde Qaraqalpaqstan Respublikasına Ándijan wálayatında jumıs alıp barıp atırǵan «Agro-Bereke» kárxanasında qadaqlanǵan, Qıtay selekciyasına tiyisli «XinLuZhong-52» sortlı paxta shigitleri alıp kelinbekte.
Kárxana baslıǵınıń málim etiwinshe, qaraqalpaqstanlı fermer xojalıqları menen usı paxta shigitiniń 1500 tonnasın jetkerip beriw boyınsha shártnamalar dúzilgen.
Usı jerde «XinLuZhong-52» paxta sortı zamanagóy texnologiyalar tiykarında qayta islengen shigit ekenin atap ótiw orınlı. Atap aytqanda, shigitler arnawlı kalibrlew procesinen ótkerilip tańlap alınadı. Sonıń menen birge, joqarı sapa kórsetkishlerin támiyinlew maqsetinde fotoseparaciya texnologiyası járdeminde qayta islenedi.
Házirgi waqıtta shigitlerdi jetkerip beriw jumısları baslandı. Paxta shigitleri Taqıyatas rayonındaǵı “Taqıyatas dán” AJ qoymaxanasına túsirilmekte hám usı qoymaxana arqalı aymaqtaǵı fermer xojalıqlarına basqıshpa-basqısh jetkerip beriliwi rejelestirilgen.
Bul jumıslar 2026-jılǵı paxta egiw máwsimin sapalı shigit penen támiyinlew, ónimdarlıqtı arttırıw hám awıl xojalıǵında nátiyjelilikti jáne de arttırıwǵa xızmet etedi.

Qaraqalpaqstan xabar agentligi