Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı – Awıl xojalıǵı ministri Kamiljan Aytbaev ministrlik jámááti menen birinshi májilisin ótkerdi.
Májilis dawamında ministrlik sistemasında atqarıw tártibin bekkemlew, xızmet wazıypaların juwapkershilik penen orınlaw hám hár bir xızmetkerdiń aymaqlarǵa shıǵıp, fermer xojalıqları hám diyqanlar menen tikkeley islesiwin kúsheytiw zárúrligi ayrıqsha atap ótildi.
Sonday-aq, aldımızda turǵan 2026-jıldıń ónimi ushın egis máwsimin shólkemleskenlik penen ótkeriw, agrotexnikalıq ilajlardı óz waqtında ámelge asırıw, fermer xojalıqlarına ámeliy járdem kórsetiw boyınsha anıq wazıypalar belgilep berildi.
Májiliste awıl xojalıǵı tarawında zamanagóy texnologiyalardı engiziw máseleleri de dodalandı.
Atap aytqanda, óndiris processlerinde jasalma intellekt texnologiyalarınan paydalanıw, sanlastırıw processlerin jedellestiriw hám maǵlıwmatlar tiykarında nátiyjeli basqarıw sistemasın jolǵa qoyıw boyınsha tiyisli tapsırmalar berildi.
Jańa basshı ministrlik jámáátin aldımızda turǵan wazıypalardı awızbirshilikli, juwapkershilik penen ámelge asırıwǵa shaqırıp, awıl xojalıǵı tarawın bunnan bılay da rawajlandırıw jolında sistemalı jumıslardı kúsheytiw zárúrligin atap ótti.

Á.Jiyemuratov,
Qaraqalpaqstan xabar agentligi