Birlesken Arab Ámirlikleriniń iri logistika hám port operatorı – “AD Ports Group” regiondaǵı geosiyasiy jaǵdayǵa qaramastan, barlıq operaciyalar ádettegidey tártipte dawam etip atırǵanın málim etti. Kompaniya qáwipsizlik ilajı sıpatında krizisti basqarıw hám biznes úzliksizligin támiyinlew rejelerin iske qosqan.
Bul process Ámirliktiń tiyisli uyımları menen birgelikte ámelge asırılıp, xızmetkerler hám qarıydarlardıń qáwipsizligine ayrıqsha itibar qaratılmaqta, dep jazadı “WAM” basılımı.
Atap ótiliwinshe, kompaniya basqarıp atırǵan barlıq portlar hám terminallar, sonıń ishinde, Xalifa portı da tolıq jumısın dawam ettirmekte. Sonıń menen birge, Ormuz buǵazı arqalı kemeler háreketiniń azayıwı sebepli Xalifa portına kirip kiyatırǵan kemelerdiń sanı qısqarıwı múmkin ekenligi atap ótildi, biraq bul port xızmetleriniń úzliksiz islewine tásir etpeytuǵını atap ótildi.
“AD Ports Group” maǵlıwmatına bola, regiondaǵı jaǵday sebepli ayırım sawda jónelisleri ózgeriwi itimalı bar hám bul kompaniyanıń globallıq teńiz tarmaqlarında júk tasıw kólemin arttırıwı múmkin. 122 júk kemesiniń kópshiligi Ormuz buǵazınan tısqarı aymaqlarda jumıs alıp barmaqta, buǵazdaǵı kemeler bolsa Persiya qoltıǵı ishindegi reyslerdi dawam ettirmekte.
Kompaniya basshısı Muhammad Juma ash-Shomisiy geosiyasiy keskinliklerge qaramastan, xalıqaralıq sawda turaqlılıǵı saqlap qalınıp atırǵanın atap ótti. Onıń sózlerine bola, nátiyjeli basqarıw hám qáwip-qáterlerdi aldınnan bahalaw arqalı kompaniya globallıq támiynat shınjırlarınıń turaqlılıǵın qollap-quwatlaydı.

Musulmon Ziyo, WzA