Ramazan qayır-saqawat hám miyrim-shápáát ayı bolıp, bul ayda járdemge mútáj shańaraqlardan xabar alıw ilajları orınlarda dawam etpekte. O’zLiDePten Qaraqalpaqstan Respublikası Joqarǵı Keńesiniń deputatı Qorazbay Eshbaev Qońırat rayonındaǵı “Xorezm,” “Qońırat,” “Ádebiyat,” “Órnek” hám “Qıyat” awıl puqaralar jıyınlarında jasap atırǵan járdemge mútáj shańaraqlardan xabar aldı.
Múbárek ramazan ayı múnásibeti menen shólkemlestirilgen bul qayırqomlıq ilajında kem támiyinlengen, sociallıq qorǵawǵa mútáj shańaraqlarǵa azıq-awqat ónimleri tarqatıldı. Sapar dawamında deputat xalıq penen pikirlesip, olardıń turmıs sharayatı, mashqala hám usınısların tıńladı.
Saqawat hám miyrim-shápáát ayında ámelge asırılǵan bunday iygilikli jumıslar puqaralar arasında óz-ara húrmet hám awızbirshilik ortalıǵın bekkemlewge xızmet etpekte. Ásirese, járdemge mútáj shańaraqlarǵa kórsetilip atırǵan itibar hám ǵamqorlıq olardıń erteńgi kúnge bolǵan isenimin jáne de arttıradı.
Partiya wákilleri tárepinen orınlarda alıp barılıp atırǵan bunday qayırlı ilajlar puqaralar máplerin támiyinlew, xalıqtıń abadanlıǵın arttırıw hám sociallıq ádillik principlerin bekkemlew jolındaǵı ámeliy háreketlerdiń ayqın kórinisi bolıp esaplanadı.