Tashkent wálayatınıń Shırshıq qalasında 2012-2013-jılları tuwılǵan jas óspirimler arasında boks boyınsha Jáhán hám Aziya chempionatınıń sıylı orın iyesi, jer júzilik áskeriy oyınlardıń chempionı Madiyar Saydraximovtıń húrmetine xalıqaralıq turnir bolıp ótti.
Jarısqa mámleketimizden tısqarı qońsılas Qazaqstan, Qırǵız Respublikalarınan da jas boksshılar qatnasıp, jeńimpazlıq ushın óz-ara bellesti.
Keskin ótken bellesiwlerde respublikamızda jaylasqan boks mektepleriniń de tárbiyalanıwshıları qatnasıp, onda eki sportshımız sıylı orındı iyelewge miyasar boldı. Atap aytqanda, 52 kg salmaq kategoriyasında ringke shıqqan Qońırat rayonı sport mektebi tárbiyalanıwshısı Javohir Amankeldiev hám Respublikalıq jeke gúres túrlerine qánigelesken sport mektebi tárbiyalanıwshısı +70 kg salmaqta Damir Tolıbaevlar gúmis medaldı qolǵa kirgiziwge miyasar boldı.
Jas boksshılarımızdı bul jarısqa trenerlerden Oralbay Qarlıbaev hám Ruslan Ametovlar tayarladı.

Adilbay Orazov,
Qaraqalpaqstan xabar agentligi sholıwshısı