Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ellikqala rayonında jańa jumıs orınların jaratıw, xalıqtıń turmıs sharayatın jaqsılaw baǵdarında ámelge asırılıp atırǵan jumıslar menen jaqınnan tanıstı.
Dáslep, Joqarǵı Keńes Baslıǵı “Zarbdor” tájiriybesi tiykarında Aqshakól boyındaǵı turizm rekreaciyalıq zonasında ámelge asırılǵan jumıslar menen jaqınnan tanıstı.
Bunnan soń, “Qabatqala” máhállesi aymaǵında “Buston-Buxgalteriya” JShJ tárepinen qaǵazdı qayta islew arqalı xojalıq qaǵazların islep shıǵarıw, “ELLIKQAL’A OLTIN TOLASI KLASTERI” JShJ tárepinen ámelge asırılıp atırǵan paxtanı qabıllaw punktin shólkemlestiriw hám tayar trikotaj ónimlerin islep shıǵarıw, “MEDI-UM ENERGY STREAM” JShJnıń polietilen trubalar islep shıǵarıw joybarları kózden ótkerildi. Isbilermenlerge jaqınnan járdem beriw, jańa jumıs orınların jaratıwǵa qaratılǵan hár qanday joybarlardı qollap-quwatlaw boyınsha juwapkerlerge anıq tapsırmalar berildi.
Sonday-aq, rayonlıq abadanlastırıw basqarması tárepinen ámelge asırılıp atırǵan jumıslar, jiyde nálin jetistiriw joybarı hám xalıqqa kórsetilip atırǵan tólemli xızmetlerdiń barısı úyrenildi. Qosımsha dáramat tabıwǵa qaratılǵan joybarlardı kóbeytiw kerek ekenligi ayrıqsha tilge alındı.
“Nawayı” máhállesindegi “BO‘STON STRAUSI” fermer xojalıǵı tárepinen túyequs baǵıw, “Qoshqora” máhállesi aymaǵındaǵı “ISLOM NASL CHORVA” JShJ tárepinen sharwashılıq kompleksin shólkemlestiriw, “Dumanqala” máhállesindegi Madaminov Allabergenniń qıytaq jerinde shólkemlestirilgen nál jetistiriw joybarları kórip shıǵıldı.
Bunnan soń, “Nawayı” máhállesi aymaǵındaǵı “Boston CHerri” fermer xojalıǵı jer maydanında jańadan jaratılıp atırǵan erik baǵına “Jasıl mákan” joybarı sheńberinde awıl aqsaqalları, nuraniylar menen birge jaqsı niyetler menen miywe nálleri egildi.
Usı kúni Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń basshılıǵında Ellikqala rayonın sociallıq-ekonomikalıq jaqtan rawajlandırıw máselelerine baǵıshlanǵan májilis ótkerildi.

Májiliste dáslep, xalıqtıń qosımsha dáramat alıwına járdemlesiw, abadan turmısın támiyinlew baǵdarında húrmetli Prezidentimiz tárepinen jaratıp berilgen jeńillikler haqqında keń túrde sóz etildi. Sonday-aq, jumıssız, sociallıq qorǵawǵa mútáj puqaralar, jaslar bántligin támiyinlew baǵdarında berilgen jeńillikler haqqında maǵlıwmat berildi.
Bunnan soń rayondı hár tárepleme rawajlandırıw, kámbaǵallıqtı qısqartıw, xalıqtıń bántligin támiyinlew hám investiciyalıq joybarlardı ámelge asırıw baǵdarındaǵı ámelge asırılıp atırǵan jumıslar, xalıqtıń múnásip turmıs sharayatın támiyinlew, jańa jumıs orınların jaratıw, abadanlastırıw jumısların alıp barıw sıyaqlı belgilengen wazıypalardıń orınlanıwı hám basqa da máseleler sın kózqarastan kórip shıǵıldı.
Onda sonday-aq, bul jumıslardı ámelge asırıwda ayırım juwapkerlerdiń óz wazıypasına nemquraydılıq penen qarap atırǵanı sınǵa alınıp, kemshilikler atap ótildi.
Sonıń menen birge, óz wazıypasın orınlawda qáte-kemshiliklerge jol qoyǵan ayırım juwapkerlerge intizamıy jaza sharaların qollanıw, zárúr bolsa, lawazımına ılayıqlıǵı máselesin kórip shıǵıw boyınsha tapsırmalar berildi.

Qaraqalpaqstan xabar agentligi.