Arqa-batıs áskeriy okrugi Ruwxıylıq hám aǵartıwshılıq orayında “Sergeklik – eń kúshli kiberqorǵaw” súreni astında keń kólemli profilaktikalıq ushırasıw shólkemlestirildi. Onda Nókis garnizonındaǵı áskeriy bólimlerdiń áskeriy xızmetkerleri, juwapker oficerler hám taraw qánigeleri qatnastı.
Ilaj dawamında Ózbekstan Respublikası Qorǵanıw ministrligi Kiberqáwipsizlik basqarmasınıń wákilleri, huqıq qorǵaw uyımlarınıń qánigeleri tárepinen zamanagóy málimleme qáwip-qáterleri, internet aldawshılıǵı, fishing hújimleri hám zıyanlı programmalardan qorǵanıw máseleleri boyınsha túsinikler berildi.
Áskeriy xızmetkerlerge xızmetke baylanıslı maǵlıwmatlardı qorǵaw, jekelik qaǵıydalarına ámel etiw, gúmanlı siltemelerdi ashpaw, belgisiz dereklerden baǵdarlama júklep almaw, quramalı parollerden paydalanıw hám eki basqıshlı autentifikaciyanı iske qosıw boyınsha anıq usınıslar berildi.
Sonday-aq, kiberjınayatlar ushın belgilengen juwapkershilik ilajları hám nızamshılıq talapları boyınsha maǵlıwmat berilip, málimleme qáwipsizligi baǵdarında áskeriy xızmetkerlerdiń juwapkershiligi ayrıqsha atap ótildi.
Ilaj juwmaǵında eń kúshli qorǵanıw quralı insannıń sergekligi hám qıraǵılıǵı ekeni atap ótildi.

Qaraqalpaqstan xabar agentligi