Usı jıldıń 16-19-iyun kúnleri Tashkent qalasında sırt el investorları, húkimetler, xalıqaralıq finans institutları hám globallıq biznes jetekshilerin birlestirgen Oraylıq Aziyanıń tiykarǵı investiciyalıq maydanı – besinshi Tashkent xalıqaralıq investiciyalıq forumı ótkeriledi.
Ózbekstan Investiciyalar, sanaat hám sawda ministrliginiń málim etiwinshe, bul yubiley forumı 2025-jıl iyun ayında ótkerilgen ánjuman nátiyjeleriniń logikalıq dawamı boladı.
Ánjuman erisilgen nátiyjelerdi bekkemlew hám investiciyalıq qarım-qatnastı jańa basqıshqa alıp shıǵıwdı maqset etken. Qatnasıwshılardıń geografiyasın keńeytiw, tarmaq baǵdarların tereńlestiriw hám ámeliy nátiyjelilikti jáne de kúsheytiw yubiley baǵdarlamasınıń tiykarǵı baǵdarları boladı.
Ótken jılǵı forumda 97 mámleketten segiz mıńnan aslam qatnasıwshı, sonıń ishinde, úsh mıńǵa shamalas sırt el miymanı qatnasqanın atap ótiw kerek. Baǵdarlama sheńberinde 150 den aslam xalıqaralıq spikerdiń qatnasıwında 36 panel sessiya shólkemlestirilgen edi. Juwmaǵında ulıwma bahası 30,5 milliard dollardan aslam bolǵan investiciyalıq kelisimler hám sawda shártnamalarına qol qoyıldı.
Forum globallıq finans institutları tárepinen bildirilip atırǵan joqarı dárejedegi isenimdi jáne bir márte tastıyıqladı, dep aytıw múmkin.
Atap aytqanda, Evropa tikleniw hám rawajlanıw banki prezidenti Odil Reno-Basso bılay dedi:
– Evropa tikleniw hám rawajlanıw bankiniń investiciya forumı sıyaqlı platformalarda qatnasıwı Oraylıq Aziyanıń uzaq múddetli potencialına bolǵan isenimimizdi hám ózbekstanlı sherikler menen birgelikte turaqlı rawajlanıw joybarların qollap-quwatlawǵa tayar ekenimizdi bildiredi.
“Linde” kompaniyasınıń baslıǵı Shteffen Rixter bolsa investiciyalıq ortalıqtaǵı unamlı ózgerislerdi atap ótti:
– Biz Ózbekstanda tikkeley sırt el investiciyaları ushın sharayatlardı jaqsılaw baǵdarında sezilerli qádemlerdi kórmektemiz. Bul strategiyalıq tarmaqlarda uzaq múddetli birge islesiwdi bekkemlew ushın bekkem tiykar jaratadı.
Xalıqaralıq investorlardıń itibarı, bárinen burın, sanaattıń rawajlanıwı hám energetika tarawına qaratıldı.
– Biz Ózbekstandı Oraylıq Aziyadaǵı áhmiyetli óndiris maydanı sıpatında kóremiz. Reformalardıń izbe-izligi hám investorlar ushın ashıq-aydınlıq uzaq múddetli sanaat jumısı ushın isenimli tiykar jaratpaqta, – dedi forum sheńberinde shıǵıp sóylegen “Knauf” basqarma baslıǵı Nikolaus Knauf.
Óz gezeginde, “Mangold Consulting” kompaniyasınıń baslıǵı Klaus Mangold ta mámlekettiń sanaat potencialın ayrıqsha atap ótken: “Oraylıq Aziyada óndiristi rawajlandırıwǵa bunshelli isenimli umtılıp atırǵan basqa mámleket joq”.
“Al Jazeera Media Network” bas direktorı Mostefa Suag bolsa tómendegishe pikir bildirgen edi: “Biz Ózbekstanda áhmiyetli transformaciyalıq processlerdi baqlap atırmız. Forum mámlekettiń globallıq qarım-qatnasqa ashıq ekenligin hám xalıqaralıq jámiyetshilik penen belsene birge islesiwge tayar ekenligin kórsetedi”.
Plenar sessiyalar menen bir qatarda, forum sheńberinde júzden aslam jergilikli islep shıǵarıwshılardıń qatnasıwında iri sanaat kórgizbesi, sonday-aq, júzlegen V2V hám V2G ushırasıwları shólkemlestirildi.
Búgingi kúnde Tashkent xalıqaralıq investiciyalıq forumı ápiwayı jıllıq ilaj emes. Ol xalıqaralıq kapital iseniminiń kórsetkishi, Ózbekstannıń globallıq baha shınjırlarına integraciyalasıw quralı hám Oraylıq Aziya menen dúnya bazarları arasında uzaq múddetli sheriklikti qáliplestiretuǵın strategiyalıq maydan bolıp esaplanadı.
2026-jıl iyun ayında ótkeriletuǵın yubiley forumı bul unamlı dinamikanıń logikalıq shoqqısına aylanadı hám Ózbekstannıń regiondaǵı eń belsendi jáne perspektivalı investiciyalıq oraylardan biri sıpatındaǵı abırayın jáne bir márte tastıyıqlaydı.

Behruz XUDOYBERDIEV, ÓzA