Qaraqalpaqstan Respublikası Joqarǵı Keńesindegi Isbilermenler háreketi – Ózbekstan Liberal-demokratiyalıq partiyası frakciyasınıń baslaması menen Qaraqalpaqstan Respublikası Ádillik ministrliginiń májilisler zalında densawlıqtı saqlaw tarawında jeke menshik sektordı bunnan bılay da rawajlandırıw máselelerine baǵıshlanǵan esap beriw májilisi bolıp ótti. Onda frakciya aǵzaları, partiyanıń Qaraqalpaqstan Respublikası Keńesi basshıları, jámiyetlik shólkemler hám ǵalaba xabar qurallarınıń wákilleri qatnastı.
Májilisti Qaraqalpaqstan Respublikası Joqarǵı Keńesiniń komitet baslıǵı Sh.Otemisov ashtı hám alıp bardı. Kún tártibindegi tiykarǵı másele boyınsha Qaraqalpaqstan Respublikası Densawlıqtı saqlaw ministri M.Qurbanovtıń esabatı tıńlandı.
Esabatta atap ótilgenindey, sońǵı jılları respublikada jeke menshik medicina mákemeleriniń sanı turaqlı ósip barmaqta. Atap aytqanda, 2020-jılı 235 bolǵan jeke menshik klinikalardıń sanı 2025-jılǵa kelip 378 ge jetken. Tek ǵana 2025-jıldıń ózinde 41 jańa jeke menshik medicina mákemesi iske qosılıp, 114 jańa jumıs ornı jaratıldı. Házirgi waqıtta 42 stacionar (1020 orınlıq) hám 336 ambulator xızmet kórsetiwshi klinikalar xalıqqa medicinalıq xızmet kórsetpekte. Birinshi tuwıw bólimi iske túsirilip, 26 jańa medicina punkti shólkemlestirildi. Barlıq klinikalar zamanagóy MRT, MSKT, 3D rentgen, UZI hám basqa da joqarı texnologiyalı úskeneler menen támiyinlenbekte.
Jeke menshik sektor tárepinen sociallıq qorǵawǵa mútáj xalıq qatlamların qollap-quwatlaw baǵdarında da ámeliy jumıslar alıp barılmaqta. Sonıń ishinde, Ramazan ayında dástúriy tárizde biypul medicinalıq tekseriwler shólkemlestirilmekte. 2025-jılı 880 puqara biypul medicinalıq tekseriwden hám emleniwden ótkerildi. Sonday-aq, mayıplıǵı bolǵan shaxslar hám kem támiyinlengen shańaraqlarǵa biypul diagnostika hám emlew xızmetleri kórsetilip kelinbekte.
Ózbekstan Respublikası Prezidentiniń PQ-2863-sanlı qararına muwapıq, jeke menshik medicina mákemeleri salıq jeńillikleri esabınan bosaytuǵın qarjılardıń keminde 25 procentin sociallıq qorǵawǵa mútáj puqaralarǵa biypul medicinalıq xızmet kórsetiwge baǵdarlap kelmekte. Biraq 2025-jıl 1-aprelden baslap PQ-229-sanlı qarar tiykarında medicinalıq xızmet kórsetiwshi yuridikalıq tárepler qosımsha qun salıǵı tólewshileri etip belgilengeni ayırım mashqalalardı payda etpekte. Usı múnásibet penen frakciya aǵzaları bul máseleni hár tárepleme úyreniw hám isbilermenlerdiń jumısın qollap-quwatlaw boyınsha usınıslar islep shıǵıw zárúrligin atap ótti.
Sonıń menen birge, Ózbekstan Respublikası Prezidentiniń PQ-311-sanlı qararına tiykarlanıp, mámleketlik medicinalıq qamsızlandırıw mexanizmleri engizildi. Nátiyjede jeke menshik medicina mákemeleri de Mámleketlik medicinalıq qamsızlandırıw qorı menen shártnama tiykarında kepillengen paket sheńberinde xalıqqa biypul xızmet kórsetiw imkaniyatına iye boldı. 2025-jıldıń juwmaqları boyınsha qamsızlandırıw qorı tárepinen 1 979,7 mlrd sum qarjı tolıq qarjılandırılǵan bolsa, 2026-jıl ushın 2 260,3 mlrd sum qarjı ajıratılıwı rejelestirilgen. Bul bolsa sistemada qarjılandırıw kólemi turaqlı artıp baratırǵanın kórsetedi.
Monitoring jumısları nátiyjesinde jollamalar sisteması, nawqaslardı elektron málimleme sistemasına kirgiziw, dári quralları hám medicinalıq buyımlar menen támiyinlew kórsetkishlerinde unamlı ózgerisler atap ótildi. Tiykarsız stacionar emlew jaǵdayları bolsa azayǵan.
2025-jıl dawamında densawlıqtı saqlaw tarawına 24 million AQSh dollarınan aslam sırt el investiciyası hám grant qarjıları tartıldı. Sonıń ishinde, Aziya rawajlanıw bankiniń qarjıları esabınan juqpalı kesellikler sonday-aq, ana hám bala salamatlıǵı mákemelerine zamanagóy medicinalıq ásbap-úskeneler jetkerip berildi. Bunnan tısqarı, UNICEF, Jáhán densawlıqtı saqlaw shólkemi hám UNFPA menen birgelikte ayırım rayonlarda birlemshi medicinalıq-sanitariyalıq járdemdi jaqsılawǵa qaratılǵan joybarlar ámelge asırılmaqta. Jeke isbilermenler tárepinen bolsa 50,2 mlrd sumlıq investiciya kirgizilip, jańa medicina mákemeleri qurıldı.
Esabat dawamında qatnasıwshılar tárepinen tarawda bar mashqalalar boyınsha soraw-juwaplar ótkerildi, usınıslar bildirildi hám olardı tereń úyreniw boyınsha kelisimge erisildi. Sonday-aq, ministrdiń esabatı tiykarında máseleni Qaraqalpaqstan Respublikası Joqarǵı Keńesininiń gezektegi sessiyasınıń kún tártibine kirgiziw boyınsha tiyisli qarar qabıl etildi.
ÓzLiDeP frakciyası densawlıqtı saqlaw sistemasında mámleketlik hám jeke menshik sektor arasında nátiyjeli birge islesiwdi kúsheytiw, isbilermenlik subektleri ushın jáne de qolaylı sharayatlar jaratıw hám xalıqqa kórsetilip atırǵan medicinalıq xızmetlerdiń sapasın arttırıw máselelerin turaqlı deputatlıq qadaǵalawda alıp baradı.

Qaraqalpaqstan xabar agentligi