Taxtakópir rayonı hákimliginde aymaqta jınayatshılıq hám huqıqbuzarlıqlardıń aldın alıwǵa baǵıshlanǵan ushırasıw bolıp ótti.
Ilajǵa mákan puqaralar jıyınlarınıń baslıqları, hayal-qızlar belsendileri, rayon prokuraturası, ishki isler uyımları hám Jaslar isleri agentligi wákilleri qatnastı.
Onda 2025-jıl hám 2026-jıl yanvar ayında jınayat isleri boyınsha Taxtakópir rayonı sudında kórip shıǵılıp juwmaqlanǵan isler boyınsha qabıl etilgen ayrıqsha uyǵarıwlardıń orınlanıwı sheńberinde ámelge asırılıp atırǵan jumıslar hár tárepleme tallandı.
Ilajda jınayat isleri boyınsha Taxtakópir rayonı sudı baslıǵı O.Maulenov qatnasıp, jınayatlardıń kelip shıǵıw sebeplerin, olarǵa imkaniyat bergen faktorlardı anıqlaw hám profilaktikalıq ilajlardı ele de kúsheytiw máseleleri boyınsha óz pikir-usınısların bildirdi. Atap ótilgenindey, jınayatshılıqtıń aldın alıw tek ǵana jazalaw menen emes, al oǵan sebep bolıp atırǵan sharayatlardı erte anıqlaw hám saplastırıw óz nátiyjesin beredi.
Ushırasıwda aymaqta huqıqbuzarlıqlardıń erte profilaktikasın jolǵa qoyıw, xalıq arasında huqıqıy mádeniyattı arttırıw hám uyımlararalıq birge islesiwdi bunnan bılay da bekkemlew tiykarǵı wazıypa sıpatında belgilendi.
Sonday-aq, jınayat isleri boyınsha sud tárepinen qabıl etilip atırǵan ayrıqsha uyǵarıwlardıń orınlanıwın orınlarda nátiyjeli shólkemlestiriw, jınayatlardıń kelip shıǵıwına sebep bolıp atırǵan faktorlardı aymaq, hayal-qızlar belsendileri, ishki isler hám jaslar shólkemleri menen birgelikte turaqlı túrde dodalap barıw zárúrligi atap ótildi.
Ilaj juwmaǵında aymaqta jınayatshılıq hám huqıqbuzarlıqlardıń aldın alıw boyınsha anıq baǵdarlar belgilep alındı.

Adilbay Orazov,
Qaraqalpaqstan xabar agentligi sholıwshısı