Muqaddes kitaplarda aytılıwınsha, insan táǵdirine hesh nárse pátiyadaǵıday tásir etpeydi eken. Sonıń ushın da milliy tárbiyamızda ata-analar, ustazlar hám kekselerdiń pátiyaların alıwǵa umtılıwǵa shaqırıw bar. Olarǵa kórsetilgen húrmet bolsa tikkeley insannıń ádep-ikramlılıǵınan derek beredi.
Xalqımızda: “alǵıs penen el kógerer”, degen naqıl biykarǵa aytılmaǵan. Ásirese, házirgi muqaddes Ramazan ayı jaqsılıqlar, jaqsı ámeller hám álbette, kóp-kóp duwalar etiletuǵın máwrit. Hár bir xalıqtıń ózine tán milliy dástúrleri bolǵanınday, ózbek xalqınıń da tákirarlanbas dástúrleri bar. Atap aytqanda, duwa etiwde de ullı hikmetli tilek bar, onıń negizinde eń gózzal tilek jámlengen. Esimizdi tanıp atırǵanımızdan, ata-babalarımız pátiyaǵa qol jayıwdan tınıshlıq-paraxatshılıq, saw-salamatlıq soraydı.
Bir oylap kóriń, insanǵa tınıshlıq hám salamatlıqtan artıq jemis bar ma? Ásirese, búgingi kúnde dúnyanıń túrli orınlarında urıstıń suwıq nápesi gezip júrgen bir waqıtta bul duwanıń qanshelli áhmiyetli hám mazmunlı ekenine isenim payda etemiz.
Mámleketimizde alıp barılıp atırǵan bir qatar baslamalardı atap ótken halda, elimizdiń tınıshlıǵı hám xalqımızdıń abadanlıǵı jolında ámelge asırılıp atırǵan reformalardı ayrıqsha atap ótiwimiz shárt. Ásirese, qońsı mámleketler menen jolǵa qoyılıp atırǵan doslıq baylanıslar, sonday-aq, sırtqı qatnasıqlarda bekkem diplomatiyalıq kózqaraslar alǵısqa ılayıq.
– Ázelden xalqımızda hár bir is aldınan duwa etiw ádetke aylanǵan. Ullı insanlar da bárqulla duwa menen bánt bolǵan, – deydi Ózbekstan musılmanları mákemesiniń baslıǵı, muftiy, shayx Nuriddin Xoliqnazar. – Meni albıratqan bir waqıyanı aytıp bermekshimen. Umra zıyaratı menen Mekkede bolıp turǵanımızda sol jerdegi watanlaslarımız bizge: “ne ushın Ózbekstan bunshelli tınısh? Shańaraqları bereketli?” degen sorawdı berdi. Komandamızdaǵılar hár kim hár qıylı juwap bergen boldıq. Soraw bergen adam bolsa: “hámmeńizdiń gápińiz durıs. Biraq tiykarǵı sebep basqa. Házirgi kúnde hesh bir millet derlik duwa etpey qoyǵan. Biraq Ózbekstanda hámme bárqulla duwada. Hátteki, mámleket basshısı da hár bir qayırlı is aldınan pátiya etedi. Sonıń ushın da ol jerde jasamasam da, Ózbekstanda tuwılǵanımnan maqtanaman”, dedi.
Haqıyqatında da, “altın alma, alǵıs al”, degen hikmet penen jasaytuǵın xalqımızdıń ıǵbalı tikkeley pátiya menen de baylanıslı. Sonı ańlaw kerek, tınıshlıq hám densawlıq sorap etilgen duwa haqıyqatında da eń gózzal tilek bolıp esaplanadı. Haqıyqatında da, búgingi qáweterli zamanda buǵan qayta-qayta isenim payda etpektemiz.
Elimiz tınısh, aspanımız ashıq bolsın! Tınıshlıq hám densawlıq tárk etpesin!

Sherbek Islomov, ÓzA