Prezidentimizdiń “Múbárek Ramazan ayın múnásip túrde ótkeriw haqqında”ǵı qararına muwapıq, Ramazan ayın “Ramazan – miyrim-shápáát, awızbirshilik hám shúkirshilik ayı!” súreni tiykarında mazmunlı hám sawaplı ámeller menen ótkeriw maqsetinde aymaqlarda keń kólemli qayırqomlıq hám iftarlıq ilajları shólkemlestirilmekte.
Usı múnásibet penen, Shomanay rayonında da xalıqtıń járdemge mútáj wákilleri ushın iftarlıq dasturxanı jayıldı.
Ilajda Shomanay rayonı hákimi A.Ametov, Ózbekstan Kásiplik awqamları Federaciyası Qaraqalpaqstan Keńesiniń baslıǵı U.Jalmenov, Qaraqalpaqstan Respublikası Joqarǵı Keńesiniń komitet baslıǵı Sh.Ótemisov hám rayon bas imam-xatibi B.Amedov qatnastı.
Olar Muqaddes Ramazan ayı múnásibeti menen bársheni qızǵın qutlıqlap, bul ilajlar xalqımız arasında miyrim-shápáátti, keńpeyillikti hám awızbirshilikti jáne de bekkemlewge, fizikalıq imkaniyatı sheklengen hám járdemge mútáj puqaralardı qollap-quwatlawǵa xızmet etip atırǵanın atap ótti.
Sonday-aq, ilajda Ramazan ayınıń pazıyletleri, saqawat hám shúkirshiliktiń insan ómirindegi ornı atap ótilip, duwaǵa ashılǵan qollar, nuranıylardıń jaqsı tilekleri hám pák niyetleri iftarlıq dasturxanına ózgeshe payız baǵıshladı.
Álbette, bunday qayırlı ilajlar jámiyetimizde insanıylıq, miyrim-shápáát hám awızbirshilik qádiriyatların jáne de bekkemlewge xızmet etedi.

Qaraqalpaqstan xabar agentligi