Usı jıldıń 18-27-fevral kúnleri aralıǵında Hamid Olimjon hám Zulfiya Isroilovanıń ómiri hám dóretiwshiligine baǵıshlap “Qosıqqa aylanǵan táǵdir” atamasında videochellendjler tańlawı ótkerilgen edi.
Tańlawda 10 jastan 18 jasqa shekemgi 100 den aslam jaslar arasınan eń jaqsı tayarlanǵan, sonday-aq, Hamid Olimjon hám Zulfiya Isroilova dóretiwshiligin sheberlik penen atqarǵan belsendi jaslar anıqlandı.
Nókis qalası “Jaslar orayı”nda usı tańlawdıń jeńimpazları anıqlanıp, sapalı videochellendj tayarlaǵan 18 qatnasıwshıǵa qáwenderler tárepinen bahalı sawǵalar tapsırıldı.
Tańlaw juwmaǵında 1-orın Ibrayım Yusupov atındaǵı dóretiwshilik mektebiniń oqıwshısı Ayjamal Sharapatdinovaǵa, 2-orın Shomanay rayonı 15-sanlı mektep oqıwshısı Qiyas Erejepbaevqa, 3-orın Qońırat rayonı 12-sanlı mektep oqıwshısı Balnur Madreyamovaǵa hám 4-orın QMU janındaǵı akademiyalıq liceydiń oqıwshısı Mashhura Ywldashevaǵa nesip etti, sonday-aq, 14 nominaciya boyınsha jeńimpazlar anıqlandı.
Jaqında Qaraqalpaqstan Respublikasında jaylasqan barlıq ulıwma orta bilim beriw mektepleri, qánigelestirilgen oqıw orınları hám texnikumlarda bilim alıp atırǵan 16 jastan 18 jasqa shekemgi oqıwshı jaslar arasında “Hamid Olimjon hám Zulfiya dóretiwshiligi búgingi kúnde de qunlı” atamasında shıǵarmalar tańlawı bolıp ótti.

Qaraqalpaqstan xabar agentligi.