Xabarıńız bar, usı jıldıń 24-fevral kúni Kóksaray rezidenciyasında Ózbekstan Respublikası Prezidenti Shavkat Mirziyoev jaslar menen ótkergen sóylesiwi dawamında xorezmli Otamurod Rayimbaevtıń biybaha talantın ayrıqsha atap ótip, onı dóretiwshilik jaqtan jáne de qollap-quwatlaw maqsetinde “Prezident sawǵası” menen sıylıqlaǵan edi.
Prezidentimizdiń arnawlı sawǵası jas talant iyesine onıń shańaraq aǵzaları hám ustazlarınıń qatnasıwında saltanatlı túrde tapsırıldı.
Xorezm wálayatınıń hákimi Jwrabek Rahimov BYD Chazor elektromobiliniń giltlerin Otamurod Rayimbaevtıń qolına tapsırıp, bárinen burın, Húrmetli Prezidentimizdiń itibarı, bunday joqarı xoshamet hám isenimi jas talant iyelerin keleshekte jáne de úlken sheklerge qaray ruwxlandıratuǵınına gúman joq ekenin atap ótti.
– Dóretiwshilik jumısımdı endi basladım hám Prezidentimizdiń alǵıslarına eristim, – deydi Úrgensh rayonındaǵı 11-sanlı balalar muzıka hám kórkem óner mektebiniń oqıwshısı Otamurod Rayimbaev. – Ashıǵın aytsam, Respublikalıq tańlawda Gran-pri sıylıǵın qolǵa kirgizgende de bunshelli tolqınlanbaǵan edim. Olardıń aldında qosıq aytıp atırǵanımda payda bolǵan bul ózgeshe tolqınlanıw ele basılmaǵan. Bárinen burın, mámleketimiz basshısı maǵan qosıq aytıwım ushın imkaniyat bergeni hám atalarday mehir kórsetip, maǵan avtomashina sawǵa etkeni ushın óz minnetdarshılıǵımdı bildiremen. Endi men sırt el kórkem óner joqarı oqıw orınlarında da bilim alıp, milliy kórkem ónerimizdiń dańqın dúnyaǵa jaymaqshıman.
Otamurod mámleketimiz basshısı sawǵa etken avtomashina giltlerin óz atasına berdi. Jas dóretiwshi hám onıń ata-anası bolsa bunday joqarı itibar ushın mámleketimiz basshısına shın júrekten minnetdarshılıq bildirdi.
– Húrmetli Prezidentimiz alıp barıp atırǵan aqılǵa uǵras reformalar biziń shetki awıllarımızǵa da kirip barmaqta, – deydi Otamurod Rayimbaevtıń ákesi Umarbek Karimov. – Sebebi, mine, usınday alıs awılda jasaytuǵın bizdey ápiwayı shańaraqtıń perzenti jaslıǵınan kórkem ónerge qızıǵıp, búgingi tán alıwlarǵa erisip atırǵanı elimizde hár kim mehir hám itibarda ekeninen derek beredi. Mámleketimiz basshısınıń aldında ulımnıń qosıq atqarǵanı tek ǵana shańaraǵımız emes, al Yangibazar rayonındaǵı “Taza Dwrman” awılındaǵılar ushın da bir ómir este qalatuǵın quwanıshlı waqıya boldı. Kishi miynetimizge berilgen bul sıylıq ushın shańaraǵımız atınan tereń minnetdarshılıq bildiremen.
Muzıka hám kórkem óner mektebiniń 4-klasında oqıp atırǵan Otamurod Rayimbaev házirgi waqıtta ustazlarınan milliy muzıka sırlarınan alǵan sabaqların úyrenbekte. Ol kórsetip atırǵan nátiyjeler tek ǵana onıń emes, al oǵan tálim-tárbiya berip atırǵan muǵallim-ustazlarınıń da jetiskenligi bolıp esaplanadı.
– Bul oqıwshımız mektebimizge kelgeninde “Xalıq saz ásbabı” bóliminiń “Qashqar rubobı” klasına qabıl etilgen, – deydi oqıtıwshısı Aybek Ataev. – Bir jıldan berli dástúriy atqarıw menen de shuǵıllanıwdı basladı. Mine nátiyjesin kórip turmız. Kámiljan Ataniyazovtıń “Mustahzod” qosıǵın ushırasıwda janlı túrde atqarǵanınan men de biraz qáweterge tústim. Sebebi ustazlardıń baǵdarında bul jasta qosıq aytıwdıń ózi bolmaydı. Bunıń ushın dawıs ta, sheberlik te jeterli bolıwı kerek. Otamurod bolsa bunı eplegenine quwandım.
Xorezm ázelden ilim hám kórkem óner oraylarınan biri bolǵan. Búgin mine usı maqtanıshlı dástúrdiń múnásip dawamshıları jetisip shıǵıp atırǵanı hámmeni quwandırmaqta.
– Húrmetli Prezidentimiz Xorezmge saparlarınan birinde Úrgensh rayonındaǵı 11-sanlı balalar muzıka hám kórkem óner mektebine de kelip, oqıwshılar, muǵallimler hám kórkem óner ǵayratkerleri menen qızǵın ushırasıw ótkergen edi, – deydi Ózbekstan xalıq artisti Ǵulomjon Eshchonov. – Sol waqıtta mámleketimiz basshısı: “Men bul dárgaydan Kámiljan Ataniyazov, Otajon Xudayshukurov sıyaqlı kórkem óner ǵayratkerleri jetisip shıǵatuǵınına isenemen!”-dep atap ótken edi. Shákirtimiz Otamurodtıń Prezidentimizdiń itibarına túskeni hám búgingi kúnde qolǵa kirgizip atırǵan jetiskenlikleri, álbette, onıń keleshekte ullı ustazlarımız izinen barıp, milliy kórkem ónerimizdiń rawajlanıwına múnásip úles qosıwına bekkem tiykar jaratadı.
Otamurod Rayimbaev sıyaqlı jas talant iyeleriniń qollap-quwatlanıwı mámleketimizde jas áwladtıń dóretiwshiligin arttırıwǵa hám kórkem óner tarawına bolǵan qızıǵıwshılıǵın jáne de arttırıwǵa xızmet etedi.

ÓzA