Bryusselde “Ózbekstan – Evropa Awqamı” parlamentlik birge islesiw komitetiniń májilisi bolıp ótti.
Senat Baslıǵınıń birinshi orınbasarı Sodiq Safoev basshılıǵındaǵı Ózbekstan delegaciyası májiliste eki tárepleme birge islesiwdiń búgingi jaǵdayı hám perspektivaların dodaladı.
Evropa tárepi Ózbekstanda ámelge asırılıp atırǵan reformalardı joqarı bahaladı hám birgeliktegi kún tártibin alǵa qoyıwǵa tayar ekenin bildirdi.
Sawda-ekonomikalıq birge islesiwdi keńeytiw hám tereńlestiriw máselelerine ayrıqsha itibar qaratıldı. Mámleketimizge Evropa investiciyaların tartıw, qospa kárxanalardı rawajlandırıw hám joqarı texnologiyalı óndirislerdi jolǵa qoyıw ushın qolaylı sharayatlar jaratılǵanı atap ótildi.
Sawda, investiciyalar, finanslıq-texnikalıq járdem, sanaat kooperaciyası, áhmiyetli materiallar islep shıǵarıw, transport, energetika, awıl xojalıǵı, “jasıl” hám sanlı ekonomika tarawlarındaǵı birge islesiwdi jáne de bekkemlew, ilim, bilimlendiriw hám mádeniy almasıwlardı jedellestiriw áhmiyetli ekenligi atap ótildi.
Insan huqıqları tarawındaǵı birge islesiw, puqaralıq jámiyetin qollap-quwatlaw hám gender teńlikti támiyinlewge ayrıqsha itibar qaratıldı.
Evropa parlamentinde (EA) “Reformalar hám birge islesiw: Ózbekstan hám Evropa Awqamı ushın jańa kún tártibi” atamasında dógerek sáwbeti de bolıp ótti.
Ilajda Evropa parlamentiniń Ózbekstan boyınsha turaqlı bayanatshısı Ilxan Kyuchyuk, EA deputatları hám institutları, tallaw orayları hám ǵalaba xabar qurallarınıń wákilleri qatnastı.
Delegaciya aǵzaları “Ózbekstan – 2030” strategiyası sheńberinde ámelge asırılıp atırǵan reformalardıń nátiyjeleri, sonıń ishinde, demokratiyalıq reformalar, ekonomikanı liberallastırıw, insan huqıqların qorǵaw sistemasın bekkemlew hám investiciyalıq ortalıqtı jaqsılaw baǵdarında erisilgen nátiyjeler haqqında maǵlıwmat berdi.
Regionallıq birge islesiw hám strategiyalıq sheriklikti rawajlandırıwǵa qaratılǵan ashıq hám pragmatikalıq sırtqı siyasattıń tiykarǵı baǵdarları atap ótildi.
Evropalı ekspertler ámelge asırılıp atırǵan reformalardı joqarı bahaladı hám Oraylıq Aziyanıń EA ushın áhmiyeti barǵan sayın artıp atırǵanın atap ótti.
2025-jıl 24-oktyabrde Ózbekstan hám Evropa Awqamı arasında keńeytilgen sheriklik hám birge islesiw haqqındaǵı kelisimge qol qoyılıwı sawda, investiciyalar, transport, áhmiyetli resurslar hám insan huqıqları boyınsha pikirlesiw tarawlarında birge islesiwdi tereńlestiriw ushın bekkem tiykar jaratadı.
Transport hám energetika baylanısların rawajlandırıw, sonıń ishinde, Transkaspiy transport koridorın rawajlandırıw, sonday-aq, bilimlendiriw, ilim, sanlastırıw, jasalma intellekt hám “jasıl” ekonomika tarawlarında birge islesiwdi keńeytiwge ayrıqsha itibar qaratılmaqta.
Dógerek sáwbeti táreplerdiń siyasiy sóylesiwdi bunnan bılay da bekkemlew hám ámeliy birge islesiwdi keńeytiwden óz-ara mápdar ekenin tastıyıqladı.

N.Abduraimova,
ÓzA